M23 yashyizeho abayobozi bashya muri Kivu y’Amajyaruguru n’Umujyi wa Goma.

Ihuriro rya AFC/M23 ryashyizeho abayobozi bashya mu Ntara ya Kivu y’Amajyaruguru, harimo no mu Mujyi wa Goma, mu rwego rwo gukomeza guteza imbere imiyoborere muri aka gace.

Ibyo byatangajwe mu itangazo ryashyizwe kuri X na Laurence Kanyuka, Umuvugizi w’umutwe wa AFC/M23 mu bya politiki, ku itariki 5 Gashyantare 2024.

M23 yagize Bahati Musanga Joseph Guverineri wa Kivu y’Amajyaruguru, aho azungirizwa na Manzi Ngarambe Willy, wagizwe Visi-Guverineri ushinzwe ibijyanye na politiki, ubuyobozi, n’amategeko. Amani Bahati Shaddrak we yagizwe Visi-Guverineri ushinzwe ubukungu, imari n’iterambere.

Bahati Musanga Joseph yari asazwe ari umwe mu bamaze igihe mu bukangurambaga bw’umutwe wa AFC/M23 akaba yari Komiseri ushinzwe imari.

Naho Manzi Ngarambe Willy na we azwi ku mbuga nkoranyambaga aho atangaza ibikorwa bya AFC/M23, ndetse ni we wari ushinzwe Diaspora.

Mu byumweru bishize, M23 yemeje ifatwa ry’Umujyi wa Goma, aho yamaze gufata ibice by’ingenzi, birimo Ishami rya Radio na Televiziyo ya Repubulika Iharanira Demokarasi ya Congo (RTNC) n’ikibuga cy’indege cya Goma.

Ibi bikaba byaraje nyuma yo gufata indi mijyi nka Minova, Sake, n’indi mijyi yo muri Kivu y’Amajyaruguru.

Ishyirwaho rya Bahati Musanga Joseph mu mwanya wa Guverineri ryaje rikurikira urupfu rwa Gen Maj Peter Cirimwami, wayoboraga iyo ntara, wishwe arashwe na M23 mu gace ka Kasengezi. Nyuma y’urupfu rwe, Perezida wa RDC, Félix Tshisekedi, yamusimbuje Maj. Gen. Evariste Somo Kakule, umuyobozi mushya wa Kivu y’Amajyaruguru.

Uretse abayobozi b’Intara ya Kivu y’Amajyaruguru, M23 yashyizeho abandi bayobozi bashya barimo Meya w’Umujyi wa Goma, witwa Mukadisi Niragire Helene. akaba yungirijwe na Ngabo Desire uyu Ngabo yahoze ari mu mutwe wa Wazalendo uhanganye na AFC/M23.