Leta yasabwe kwihutisha itegeko ryemera abangavu kuboneza urubyaro.

Bamwe mu rubyiruko rwo mu karere ka Rubavu bari kumwe n'umuryango uharanira uburenganzira bwa Muntu mu biyaga bigari Great Lacs Initiatives For Human Right and Development (GLIHD) basabye Leta kwihutisha itegeko ryemerera abangavu rufite imyaka kuboneza urubyaro.

Ubuyobozi bwa GLIHD bushima Leta y'u Rwanda ku ntambwe yatewe aho gukuramo inda ku bangavu byemewe n'amategeko ndetse bikaba byaramanutse bikorerwa ku rwego rw'ikigo nderabuzima(Health Centers).

Mu mpera z'icyumweru gishize ubwo inzego zitandukanye zo mu turere twa Rubavu, Nyabihu na Rutsiro zahugurwaga ku myanzuro Nama Ngarukagihe y'Umuryango w'Abibumbye (UN Universal Periodic Review).

Me Umulisa Vestine umuyobozi mukuru wungirije wa GLIDH aganira n'itangazamakuru yavuze ko iyo bahugura baganira n'abaturage baba bagamije kurebera hamwe uko imyanzuro Nama bayibona, uko ishirwa mu bikorwa ashima ko Leta y'u Rwanda ikora ibishoboka byose ngo ishirwe mu bikorwa ariko bagasaba ko mu kureba ibyagezweho bajya basanga iyatanzwe ku Rwanda hafi ya yose yarashizwe mu bikorwa.

Agaruka ku gukuramo inda ku bangavu no kuboneza urubyaro yagize ati: "Turashima Leta yacu kuba yaremereye abangavu gukuramo inda ikabigeza no kurwego bikorerwa ku kigo nderabuzima ariko ntabwo baremerera abangavu kuboneka urubyaro."

Akomeza agira ati: "Twabisabye Inteko ishinga amategeko umushinga barawufite kuko niba umwana yemewe gukuramo inda akwiye kwemererwa no gukoresha uburyo bumufasha kwirinda isama ariko twizeye ko nabyo bizihutishwa."

Itegeko rizafasha kuko ukeneye gukora imibonano mpuzabitsina birinda aho bari gukora ubuvugizi ngo byihutishwe gusa ngo baracyagorwa n'imyumvire y'amadini.

Umwiza Gentille umwe mu rubyiruko rwo mu karere ka Rubavu bishimira kuba basobanurirwa imyanzuro Nama Ngarukagihe y'Umuryango w'Abibumbye (Universel Period Review UPR) kuko bituma bayimenya ndetse bakagira uruhare mu ishirwa mu bikorwa.

Ku bijyanye no kwemererwa abangavu gukoresha uburyo bwo kuboneza urubyaro yagize ati: ‘’Turasaba Leta kudufasha bikihutishwa kuko byadufasha niba wemerewe gukuramo inda unemerewe kuyirinda byadufasha, kuko hari nubwo wahura n'ingaruka mu gukuramo inda, byadufasha kwirinda ingaruka no guhangayika mu gihe wasamye utabiteguye nturindire kujya kwa muganga gukurishamo inda."

Binyuze mu muryango Great Lakes initiatives For Human Right and Development (GLIHD) bavuga ko bafashe gahunda yo kuzenguruka mu turere bakorana baganira n'abaturage cyane urubyiruko barumenyesha imyanzuro, bayishira mu buryo buborohera kuyumva kurushaho kugira biborohere kuyigiramo uruhare. 

Igihugu cy'u Rwanda cyahawe imyanzuro 160 harimo iyibanda ku burezi, abafite ubumuga,ubuzima n'ibindi bitandukanye bikorwa bigahindurira ubuzima abaturage.

Zimwe mu ngero GLIDH ivuga harimo kuba abafite Ubumuga kwivuriza kuri mituweli, gukuramo inda ku bangavu, insimburangingo zagiye kuri mituweli, kuba mu butabara abafite ubumuga basemurirwa n'ibindi bitandukanye.

Zimwe mu mbogamizi nuko abafite ubumuga bakigorwa no kubona akazi n'ibindi bitarajya mu buryo.

GLIHD kuri uyu mushinga irakorana n'uturere 15 two mu Rwanda aho baganira n'abikorera, urubyiruko, amakoperative ariko bagorwa no gusanga ibyo byiciro batazi imyanzuro Nama aho abaganirijwe basabwa kuyigeza no ku bandi.