Kajugujugu ya gisirikare yagoganiye mu kirere na Bombadier CRJ700 i Washington 18 barapfa.

Ku mugoroba wo ku wa Gatatu, tariki ya 29 Mutarama 2025, indege ya PSA Airlines yo mu bwoko bwa Bombardier CRJ700 yagonganye n'indege ya gisirikare ya Leta Zunze Ubumwe za Amerika yo mu bwoko bwa Sikorsky H-60 Black Hawk, hafi y'ikibuga cy’indege cya Ronald Reagan Washington National Airport.

Iyi mpanuka ikomeye yabereye hejuru y'umugezi wa Potomac, aho ibice by’indege byaguye, bituma ibikorwa by’ubutabazi bihita bitangira.

Uko byagenze

Indege ya PSA Airlines, yari itwaye abagenzi 60 n’abakozi bane, yavaga i Wichita muri Kansas yerekeza i Washington. Kajugujugu ya gisirikare, yari mu myitozo, yatwaye abasirikare batatu.

Raporo y’ibanze igaragaza ko abashinzwe kugenzura indege bagerageje kuburira abapilote ba kajugujugu ku ndege ya PSA Airlines yari iri hafi, ariko ntibashoboye gusubiza mbere y’uko impanuka iba.

Umwe mu bakozi bo ku kibuga cy'indege yagize ati: "Byari ibintu biteye ubwoba! Twabonaga ibice by’indege bigwa mu mazi. Byabaye vuba cyane."

Ibyakurikiriyeho

Nyuma y'impanuka, ibikorwa by’ubutabazi byihutiye gukorwa n’abashinzwe umutekano. Kuva ku ijoro ry’iyo tariki, abashakisha bakomeje ibikorwa mu mugezi wa Potomac, kuko hari abakekwaho kuba baguye mu mazi.

Ibiro bishinzwe iby’indege muri Amerika (FAA) n’Ikigo cy’Igihugu gishinzwe umutekano w'indege (NTSB) byahise bitangira iperereza ku cyateye impanuka.

Perezida wa Amerika, Donald Trump, yihanganishije imiryango y’ababuze ababo, avuga ko iyi mpanuka yari kwirindwa, anasaba iperereza ryimbitse.

Kuva ejo hashize, byemejwe ko abantu 18 bamaze kuboneka bapfuye, abandi bagishakishwa.

Ni mu gihe ikibuga cy’indege Ronald Reagan Washington National Airport cyahagaritse ingendo zose kugeza uyu munsi ku wa 30 Mutarama saa tanu z’amanywa.

Iki kibazo cy’umutekano w’indege za gisivile n’iza gisirikare muri Amerika cyongeye gutera impaka.