M23 yatangaje ko Ikeneye Igisirikare Gishya, ntiyifuza kwinjira mu nzego za Leta ya Kinshasa

Ku nshuro ya mbere, umwe mu bayobozi b’inyeshyamba za AFC/M23, Bertrand Bisimwa yatangaje ko batifuza kwinjira mu nzego za Leta ya Repubulika Iharanira Demokarasi ya Congo (RDC), yaba mu buyobozi bwa politiki cyangwa se mu gisirikare gisanzwe.

Mu butumwa yanyujije ku rubuga rwa X, yavuze ati: "Ntidukeneye kwinjira muri Leta ya Congo cyangwa mu gisirikare cya Congo. Turimo kuganira i Doha kugira ngo twubake igisirikare gishya igisirikare gishoboye kurinda Abanye-Congo no kurengera ubutaka bw’igihugu."

Aya magambo yagaragaje icyerekezo gishya cy’itsinda rya M23, aho rigaragaza ko ridashyigikiye gusaba imyanya mu buyobozi bwa Leta cyangwa kwinjizwa mu ngabo za FARDC nk’uko byagiye bikorwa mu masezerano yo mu bihe byashize. Ahubwo, M23 irasaba ko hashyirwaho igisirikare gishya, kivuguruye, kizajyamo ingabo z’uruhande zombi mu rwego rwo kongera kubaka icyizere no kongera umutekano w’igihugu hose.

Ayo magambo yavugiwe i Doha muri Qatar, aho ibiganiro bikomeje hagati ya bamwe mu bayobozi b’inyeshyamba n’abandi bafatanyabikorwa mpuzamahanga, hagamijwe gushaka igisubizo kirambye ku ntambara imaze igihe kinini mu burasirazuba bwa RDC, cyane cyane mu Ntara ya Kivu y’Amajyaruguru.

Ibyatangajwe na Bisimwa byashidikanyijweho na bamwe mu banyapolitiki ba Congo, bavuga ko icyo cyifuzo cy’igisirikare gishya gishobora kuba inzira yo gucamo igihugu ibice cyangwa kugabana ubutegetsi mu buryo butemewe n’amategeko. Ariko ku ruhande rwa M23, bavuga ko ari uburyo bwo kubaka igihugu gishyira imbere umutekano n’ubwiyunge aho gukomeza gusubira mu masezerano atagira icyo ageraho.

Aya magambo ya Bisimwa yateje impaka mu banyapolitiki n’abasesenguzi mu karere, bamwe babibona nk’intambwe iganisha ku mahoro arambye, abandi bakabyita umugambi wo kunaniza ubutegetsi buriho. Gusa byose bigaragaza ko intambara yo mu burasirazuba bwa RDC ikeneye igisubizo kirambye gifatiye ku biganiro, ubushishozi, n’ukwiyumvisha ko amahoro y’abaturage ari cyo cy’ingenzi.