Ibikorwa by’urugomo n’ubwicabyi byakorewe Abatutsi mu 1973 mu makomini ya Perefegitura ya Gitarama

Nk’uko bisobanurwa n’ubushakashatsi Komisiyo y’Igihugu yo Kurwanya Jenoside (CNLG) yakoze ku mateka ya Jenoside yakorewe Abatutsi muyahoze ari Perefegitura ya Gitarama ubwicanyi n’ibikorwa by’urugomo byibasiye Abatutsi mu 1973 byakozwe guhera mu mpera za Gashyantare 1973. Umugambi w’abateguye ibyo bikorwa bibi kwari ukwibasira Abatutsi bose bahereye ku bari mu mashuri no mu kazi. Abayobozi bakuru ba PARMEHUTU harimo na Perezida Kayibanda Grégoire nibo bashishikarije abayoboke babo gutangira ibikorwa byo gutwikira Abatutsi, gusenya inzu zabo no kubica.

Mu makomini ya Tambwe, Kigoma, Murama, Mugina na Mukingi naho ibikorwa by’urugomo birimo gutwikira Abatutsi no kubamenesha byabaye muri Werurwe 1973. Abatangabuhamya batandukanye bavuga ko Niyonzima Maximilien yagize uruhare mu bikorwa by’urugomo byabakorerwaga. Yabwiraga abaturage ko umugambi wabo wapfubye, ko icyo bashakaga kugeraho kitakunze.

Ikigaragara ni uko ubwicanyi n’ibikorwa by’urugomo byakorewe Abatutsi bitagenze nk’uko abategetsi babyifuzaga, kuko bari bagamije kwica Abatutsi mu buryo bwagutse atari ukubirukana mu mashuri no mu kazi gusa. Nubwo hari Abatutsi bishwe icyo gihe, umugambi wa Perezida Kayibanda n’abambari be nka Maximilien Niyonzima n’abandi, kwari ukubamaraho.

Kubera urwango Perezida Kayibanda yari afitiye Abatutsi, ntabwo yigeze asobanukirwa n’icyihishe inyuma y’imvururu zo mu 1973. Yishimiye ko Abatutsi birukanwa mu mashuri, mu mirimo, gutwikirwa no kwicwa, nyamara atazi ko abamurwanyaga barimo abasirikare bakuru b’Abakiga bamutije umurindi kugira ngo babone impamvu yo kumuvana ku butegetsi bamushinja kudashobora kugarura amahoro n’umutekano mu baturage.

Habyarimana Juvénal yagendeye ku bibazo by’umutekano muke wari imbere mu gihugu, kandi ariwe Nyirabayazana, bimuha iturufu yo gukora coup d’Etat, ashinja Kayibanda kunanirwa kugarura amahoro mu gihugu.