Jamal Musiala yongereye amasezerano muri Bayern Munich.

Ikipe ya Bayern Munich yakomeje kwiyubakira ahazaza heza nyuma yo kongerera amasezerano umwe mu bakinnyi bayo b’ingenzi, Jamal Musiala, azageza muri Kamena 2030.

Uyu mukinnyi w’imyaka 21, ufatwa nk’umwe mu mpano zikomeye muri ruhago y’Isi, yageze muri Bayern avuye muri Chelsea mu 2019. Kuva ubwo, yihuse mu iterambere, atangira kubaka izina rye nk’umukinnyi ufite impano idasanzwe mu kibuga hagati.

Nyuma y’iyi nkuru nziza, ubuyobozi bwa Bayern Munich bwagaragaje ibyishimo n’icyizere cy’ejo hazaza ha Musiala mu ikipe.

Herbert Hainer, Perezida w’ikipe, yagize ati: "Abafana baza kuri sitade kubera abakinnyi nka Jamal Musiala. Ni impano idasanzwe kandi ni iby’agaciro gukomeza kumugumana mu ikipe yacu."

Jan-Christian Dreesen, Umuyobozi mukuru wa Bayern, na we yashimye Musiala, avuga ko ari umukinnyi ukiri muto ariko ufite igikundiro gikomeye mu kibuga.

Musiala azajya ahembwa miliyoni 25 z’ama-euro ku mwaka, bivuze ko agiye kuba umwe mu bakinnyi bahembwa neza muri shampiyona y’u Budage (Bundesliga). Amasezerano ye mashya anagaragaramo ingingo y’uko ashobora kugurwa n’indi kipe, ariko igomba kwishyura miliyoni 175 z’ama-euro.

Musiala ntabwo ari umukinnyi usanzwe muri Bayern. Uburyo akinamo, ubuhanga bwe mu gucenga ndetse n’uburyo atanga imipira byamugize umwe mu bakinnyi bakomeye ku Isi. Ndetse, nubwo akiri muto, afatwa nk’icyitegererezo ku bakinnyi bato bagira inzozi zo kugera kure muri ruhago.

Iyi nkuru ni inkuru nziza ku bafana ba Bayern Munich kuko ishimangira ko iyi kipe izakomeza kugira uruhare rukomeye mu mupira w’amaguru ku rwego rw’Isi, ifite abakinnyi b’abahanga nka Jamal Musiala.

Kugumana Musiala bivuze ko Bayern izakomeza guhangana n’amakipe akomeye ku rwego mpuzamahanga. Uyu mukinnyi ashobora kuba umukinnyi w’ingenzi mu migambi ya Bayern yo gushaka igikombe cya Champions League no gukomeza kwigaragaza nk’ikipe ikomeye i Burayi.