Inkongi y’umuriro muri Los Angeles: Ibyihutirwa ku buzima n’umutekano w’abaturage.

Inkongi y’umuriro ikomeye yibasiye umujyi wa Los Angeles, muri leta ya California, ikomeje guteza impagarara, gusenya imitungo, no gushyira ubuzima bw’abantu mu kaga.

Kuva iyi nkongi yatangira ku itariki ya 7 Mutarama 2025, imaze kwangiza byinshi: abantu 27 bamaze guhitanwa n’umuriro, 16 baburirwa iengero, inzu zirenga ibihumbi 120 zasenyutse, naho abari hagati y’ibihumbi 100 na 150 bamaze kwimurwa mu byabo kubera ikibazo cy’umutekano muke.

Imbarutso y’iyi nkongi iracyari gukorwaho iperereza, ariko abahanga mu bijyanye n’inkongi bagaragaza ko umuyaga wa Santa Ana, uzwiho umuvuduko mwinshi, ushobora kuba warongereye ubukana bw'umuriro, bigatuma ugenda ukwira vuba cyane.

Iki kibazo cyageze ku rwego rwo guhindura byinshi mu buzima bw’abaturage, ndetse kikanashyira ubuzima bwa benshi mu kaga.

Abashinzwe kuzimya umuriro barakoresha uburyo bugezweho, harimo indege zisuka uruvange rw’amazi n’imyunyu ihangana n’umuriro.

Gusa, ibikorwa byo kugabanya ubukana bw’iyi nkongi biracyagoye kubera ubuso bunini bwibasiwe n’umuriro. Leta ya California, ku bufatanye n’inzego z’ubutabazi, yasabye abaturage kwimuka byihuse mu duce dufatwa nk'utugarijwe.

Amakuru aturuka mu nzego z’umutekano avuga ko hakomeje gushakishwa uko harindwa ubuzima bw’abaturage n’ibisigaye mu mitungo yabo.

Abanyarwanda batuye muri Los Angeles na bo bari mu bagezweho n’ingaruka z’iyi nkongi. Amakuru yizewe avuga ko bamwe bimuwe bakajyanwa mu bindi bice by’umutekano, mu rwego rwo kwirinda ingaruka zashoboka.

Ibikorwa byo gufasha abimuwe birimo gutangwa n’abagiraneza n’imiryango ifasha mu bihe by’ibiza. Binyuze mu miryango y’abanyarwanda n’ubufatanye bwa ambasade, hakomeje gushyirwa imbere gahunda zo gukusanya inkunga no gufasha abahuye n’iki kibazo gikomeye.

Imiryango mpuzamahanga ifasha mu bihe by'ibiza, nka Red Cross na FEMA, irimo gukorana n’inzego z'ubuyobozi bwaho kugira ngo hatangwe ubutabazi bw’ibanze, birimo amazi meza, ibiryo, n’ubuvuzi. N’ubwo hari byinshi byamaze gukorwa, haracyakenewe imbaraga nyinshi mu kugenzura no gukumira ko umuriro ukomeza gukwirakwira.

Mu gihe ibikorwa byo kuzimya umuriro bikomeje, haributswa abaturage gukomeza kuba maso no gukurikiza amabwiriza atangwa n’inzego z'ubutabazi. Haributswa kandi abaturage gutanga amakuru y’aho ikibazo cyaba cyakajije umurego kugira ngo hakoreshwe ingamba zihuse.

Iyi nkongi igaragaje neza ubukana bw’ingaruka z’imihindagurikire y’ikirere, cyane ko ubukana nk’ubu bugaragara kenshi muri iki gihe.

Ni ingenzi gukomeza gushora mu guhangana n’ibihe nk’ibi no gushyiraho ingamba zikomeye zo kwirinda no kugabanya ibyangirika.

Abakurikira iyi nkuru barasabwa gukomeza kuyikurikiranira hafi kugira ngo bamenye amakuru mashya n’imyanzuro y’ingenzi mu guhangana n’ibihe bikomeye byibasiye Los Angeles.