Impamvu Urukiko  Rwahaye Trump Ububasha bwo Kwambura Abimukira 500,000 Uburenganzira

Ku wa 30 Gicurasi 2025, Urukiko rw'Ikirenga rwa Leta Zunze Ubumwe z'Amerika rwemeje ko ubutegetsi bwa Perezida Donald Trump bushobora gukuraho by'agateganyo uburenganzira bwo kuba no gukorera muri Amerika ku bantu barenga 530,000 bakomoka muri Cuba, Haiti, Nicaragua na Venezuela.

Aba bantu bari bahawe uburenganzira bwo gutura no gukorera muri Amerika binyuze muri gahunda ya 'humanitarian parole' yashyizweho k'ubutegetsi bwa Perezida Joe Biden kugira ngo bafashwe mu gihe cy'amage mu bihugu byabo. 

Iki cyemezo cy'Urukiko rw'Ikirenga cyaje nyuma y'uko urukiko rwo rw'ibanze rwari rwabujije ubutegetsi bwa Trump gukuraho iyi gahunda. Abacamanza babiri, Ketanji Brown Jackson na Sonia Sotomayor, ntibashyigikiye iki cyemezo, bavuga ko gishobora kugira ingaruka zikomeye ku bukungu n'imibereho y'abaturage, ndetse no ku muryango mugari. 

Iyi gahunda ya 'humanitarian parole' yari yarashyizweho mu 2022 na Perezida Biden kugira ngo ifashe guhangana n'ibibaza by'abimukira ku mupaka wa Amerika na Mexique, ikemerera abimukira bafite imiryango ibafasha muri Amerika kwinjira no gukorera mu gihugu mu gihe cy'imyaka ibiri. 

Icyemezo cy'Urukiko rw'Ikirenga gishobora gutuma aba bantu barenga 530,000 babura uburenganzira bwo gutura no gukorera muri Amerika, bikaba bishobora kugira ingaruka zikomeye ku miryango yabo, abakoresha babo, ndetse n'imiryango yabo muri Amerika.

Abasesenguzi bavuga ko iki cyemezo kigiye gushyigikira imigambi ya Perezida Trump yo gukaza amategeko ajyanya no gukumira abimukira, ndetse ko gishobora kugira ingaruka ku bantu barenga 900,000 bafite uburenganzira bwo gutura muri Amerika by'agateganyo.