Sobanukirwa n'amateka ya George Foreman witabye Imana ku myaka 76

Umuryango wa George Foreman, uzwi ku izina rya "Big George," watangaje ko yitabye Imana afite imyaka 76. Foreman yari umwe mu bakinnyi b’iteramakofe bakomeye mu mateka, akaba yaragize uruhare rudasanzwe muri uyu mukino mu gihe cy’imyaka irenga 20.

Uyu mukinnyi w’icyubahiro yatwaye umudali wa zahabu mu mikino Olempike yabereye i Mexico City mu 1968. Yaje kwegukana ikamba ry’umukinnyi wa mbere mu cyiciro cy’abakinnyi baremereye inshuro ebyiri, aho yaciye agahigo ko kongera gutwara iri kamba afite imyaka 45, aba umukinnyi wa mbere mukuru mu mateka wegukanye iri rushanwa.

Nubwo yari umukinnyi ukomeye, Foreman yahuye na Muhammad Ali mu mukino w’ibihe byose uzwi nka Rumble in the Jungle wabereye i Kinshasa mu 1974, aho yatsinzwe akamburwa ikamba. Uyu mukino wagizwe icyitegererezo mu mateka y’iteramakofe kubera ubuhanga Ali yakoresheje bwo kwirinda ibitero bya Foreman (rope-a-dope) kugeza amuteye igitego cyatumye atsindwa.

Foreman yasoje urugendo rwe mu iteramakofe mu 1997 nyuma yo gutsinda imikino 76 muri 81 yakinnye, harimo 68 yayitsinze kuri knockout. Yibukirwa ku budasa bwe muri ring, imbaraga zidasanzwe, n’ubushishozi bwamuranze ku murimo we.

Nyuma yo gusezera kuri uyu mukino, Foreman yahisemo kuba umuvugabutumwa w’ijambo ry’Imana. Yashinze itorero muri leta ya Texas, ahatangira umurimo wo gukangurira abantu ubuzima bwiza bwuzuye amahoro n’ukwemera.

Umuryango we, mu itangazo washyize hanze, wagize uti: "Twabuze umubyeyi mwiza, umugabo w’intangarugero, n’umuntu wari intangarugero mu gukunda abandi. Yabayeho ubuzima bw’ukwemera, guca bugufi no kwitangira abandi."

George Foreman yavukiye mu muryango utifashije mu 1949, aho nyina yamutaye akiri muto. Yaje kugwa mu buzima bw’ubujura, ariko iteramakofe rimubera inzira y’icyizere, akagera ku rwego rwo kuba icyamamare.

Ubutwari bwe n’inkuru ye ishimangira ko umuntu ashobora guhindura ubuzima bwe no gukomeza kugira uruhare rukomeye ku isi. George Foreman azahora yibukwa nk'umwe mu barwanye intambara zitandukanye, yaba muri ring cyangwa mu buzima busanzwe.