FERWAFA yanyomoje amakuru y’ibihuha aherutse gutangazwa

Ishyirahamwe ry’umupira w’amaguru mu Rwanda (FERWAFA) ryanyomoje amakuru  yasakaye ku mbuga nkoranyambaga avuga ko Minisiteri ya Siporo yasabye ko amatora ya Komite Nyobozi yari ateganyijwe ku tariki ya 30 Kanama 2025 yahagatswe. FERWAFA yatangaje ko iyo nkuru ari ibihuha kandi ko nta mabwiriza nk’ayo yigeze ihabwa.

FERWAFA yatangaje ko amatora ya Komite Nyobozi azakomeza uko yateguwe, agashyirwa mu bikorwa binyuze mu Nteko Rusange Isanzwe izaba ku 30 Kanama 2025.

Mu itangazo ryasohowe kuri uyu wa Kabiri tariki ya 29 Nyakanga 2025, FERWAFA yasabye abanyamuryango bayo, abafatanyabikorwa, n’abakunzi b’umupira w’amaguru kujya bakoresha amakuru yizewe kandi aturuka ku nzego zemewe. Yanaburiye abantu kwirinda gukwirakwiza amakuru y’ibihuha agamije gukurura urujijo muri Rubanda.