Amakuru mashya: RURA yatangaje ibiciro bishya bizajya byishyurwa hakurikijwe ibirometero wagenze.

Itangazo ryatanzwe n’Urwego rw’Igihugu rushinzwe kugenzura imikorere y’inzego zimwe z’imirimo ifitiye igihugu akamaro (RURA) riramenyesha abaturarwanda bose, cyane cyane abagenzi bakoresha imodoka zitwara abantu mu buryo bwa rusange mu Mujyi wa  Kigali, ko guhera ku itariki ya 04 Ukuboza 2024, hazatangizwa igerageza ryo kwishyura hakurikijwe urugendo umugenzi yakoze, aho kwishyura amafaranga ahwanye n’urugendo (ligne) rwose.

Igerageza rizatangirira ku mihanda ya Nyabugogo-Kabuga na Downtown-Kabuga mbere yo gukwirakwizwa mu Mujyi wa Kigali.

Abagenzi bazajya bakoresha uburyo bwa “Tap and Go” aho bazajya bongeraho ikarita (tap out) bageze aho basohokera muri bisi. Uko amafaranga azajya abarwa bizaterwa n’ibilometero umuntu yagenze, igiciro cyatanzwe ni 182 Frw ku kilometero cya mbere n’icya kabiri, 205 Frw ku cya gatatu, kikazamuka buhoro kugeza kuri 855 Frw ku bilometero 25.

Urugendo rwa Downtown – Remera (10km) ruzaba 388 Frw, mu gihe Downtown – Rwandex (6km) ruzaba 274 Frw. Urugendo rwa Sonatube – Prince House (2km) ruzaba 182 Frw naho Nyabugogo – Kabuga (25km) ruzaba 855 Frw.

Abagenzi bagendera ku ntera ngufi bazabona inyungu kuko ibiciro byabo bizagabanuka.

Minisitiri Dr Gasore yavuze ko ubu buryo buzafasha abagenzi, cyane ko bwatekerejweho nyuma yo gukuraho Nkunganire. Yongeyeho ko ibiciro by’ingendo ndende bishobora kwiyongera, ariko abakora ingendo ngufi bazungukira.