Abanyamakuru b’ubushongore n’ubukaka bagaragaye kuri radio nshya ‘SK FM’.

Kuri uyu wa Mbere, radiyo nshya y’umunyamakuru Sam Karenzi yiswe SK FM yafunguwe ku mugaragaro, yumvikana ku murongo wa 93.9 FM. Ifungurwa ry’iyi radiyo ryari rimaze igihe rivugwa mu itangazamakuru, ariko ubu ibyari inzozi byabaye impamo.

SK FM yatangiranye imbaraga zidasanzwe, izana abanyamakuru bakomeye bazwi ku bitangazamakuru bitandukanye mu Rwanda.

Mu muhango wo kuyifungura ku mugaragaro, witabiriwe n’abayobozi batandukanye barimo Mutesi Scovia, uyobora Urwego rw’Itangazamakuru Ryigenzura (RMC), ndetse n’abandi bafite aho bahuriye n’itangazamakuru.

Abanyamakuru bazanye ubukaka muri SK FM

SK FM yazanye abanyamakuru bafite amazina akomeye mu byiciro bitandukanye by’amakuru, bigaragaza icyerekezo cyayo cyo gutanga ibiganiro bifite ireme.

·         Mu biganiro by’imikino: hazamo amazina azwi nka Kazungu Claver, Niyibizi Aimé, Ishimwe Ricard, Sam Karenzi ubwe, Allan Ruberwa, na Keza Cédric.

·         Mu gice cy’Imyidagaduro: harimo Bianca Baby na MC Nario, bazwiho gutanga ibirori byiza no gukurura abafana benshi.

·         Mu makuru ya Politiki n’ubusesenguzi: harimo Eddy Sabiti, Uwera Jean Maurice, na Hakuzumuremyi Joseph, bazwiho gutanga ubusesenguzi buhanitse ku bibera mu gihugu no ku isi.

Ikiganiro gishya cy’imikino: "Urukiko rw’Ikirenga"

SK FM yazanye ikiganiro gishya cy’imikino cyitwa “Urukiko rw’Ikirenga”, kizajya gitambuka buri munsi kuva ku wa Mbere kugeza ku wa Gatanu, kuva saa yine z’amanywa kugeza saa saba. Iki kiganiro cyitezweho kugaruka ku nkuru nshya z’imikino, isesengura ry’imikino mpuzamahanga n’iyo mu gihugu, ndetse n’ibiganiro mpaka ku byerekeranye n’imikino itandukanye.

SK FM iraje gushimangira urwego rw’itangazamakuru mu Rwanda

Ifungurwa rya SK FM rirerekana ko itangazamakuru mu Rwanda rikomeje gutera imbere, ritanga urubuga ku banyamakuru bafite ubunararibonye n’abafite impano nshya. Abakurikirana itangazamakuru biteze byinshi kuri iyi radiyo nshya, by’umwihariko kubera uburyo yazanye abanyamakuru bafite uburambe n’ubuhanga mu byiciro byose.

SK FM ni radiyo izajya yumvikana mu Mujyi wa Kigali n’ahandi hose ifite ubushobozi bwo gukwirakwira, ikazaba ishyashya mu mwuga w’itangazamakuru mu Rwanda.