APR FC ikomeje kugorwa no gusogongera ku mwanya wa Mbere nyuma yo gusitara kuri Gasogi United

Ku mugoroba wo ku wa Gatanu, tariki 14 Werurwe 2025, ikipe ya APR FC yongeye kwibazwaho cyane nyuma yo gutakaza amahirwe yo kuyobora urutonde rwa shampiyona, inganyije na Gasogi United 0-0 kuri Kigali Pelé Stadium.

Uyu mukino w’umunsi wa 21 wa shampiyona wari ingenzi kuri APR FC kuko gutsinda byari gutuma igira amanota 44, igasimbura Rayon Sports ku mwanya wa mbere. Gusa, abasore ba Gasogi United bakoze ibishoboka byose ngo babuze APR FC kubona igitego, binatuma iyi kipe y’ingabo iguma ku mwanya wa kabiri n’amanota 42.

Uburyo bwinshi bwahushijwe, APR FC inanirwa gutsinda

APR FC yatangiye umukino isatira bikomeye, ariko Gasogi United yagaragaje imbaraga mu bwugarizi. Mu gice cya mbere, APR FC yabonye uburyo bwiza burimo ishoti rikomeye rya Cheick Ouatarra Djibril, ariko umunyezamu Ibrahima Dauda aritangira neza.

Mu gice cya kabiri, APR FC yakoze impinduka kugira ngo yongere imbaraga mu busatirizi, Mugisha Gilbert asimbura Hakim Kiwanuka, naho Denis Omedi asimburwa na Mamadou Sy ngo ikipe igire ba rutahizamu babiri. Gusa, Gasogi United yakomeje kwihagararaho, ndetse umusifuzi yanga penaliti ikipe ya APR FC yasabaga ku munota wa 69 ubwo Mugisha Gilbert yagwaga mu rubuga rw’amahina.

Gasogi United yihagazeho, APR FC itakaza amanota abiri yari kuyifasha byinshi

Gasogi United, nubwo itaremyemo APR FC uburyo bwinshi bwo gutsinda, yakinnye umukino wo kwirwanaho, bigera aho abakinnyi bayo basa n’abananiwe. Gusa, uko byagenda kose, bashoboye kwihagararaho iminota 90 n’iyongeweho itanu irangira ari 0-0.

Iyi ntsinzi itariyo kuri APR FC yayisize ku mwanya wa kabiri n’amanota 42, mu gihe Rayon Sports ifite 43 ikaba itegereje gukina na AS Kigali kuri uyu wa Gatandatu. Ibi bivuze ko amahirwe yo gufata umwanya wa mbere kuri APR FC yagumye mu biganza bya Rayon Sports.