M23 yemeje ko yigaruriye umujyi wa Goma: Ubutumwa bwerekana impinduka zikomeye.

Umujyi wa Goma, umwe mu mijyi y’ingenzi yo mu burasirazuba bwa Repubulika Iharanira Demokarasi ya Congo (RDC), watangajwe ko wamaze kubohorwa n’umutwe wa M23.

Ni inkuru ikomeje kuvugisha benshi mu karere, aho uyu mutwe uvuga ko ibintu byamaze kugera ku murongo, ugasaba abasirikare ba FARDC gushyikiriza intwaro zabo MONUSCO bitarenze amasaha make.

Mu itangazo ryashyizwe hanze na Lawrence Kanyuka, umuvugizi wa AFC/M23, mu rukerera rwo ku wa Mbere tariki 27 Mutarama 2025, umutwe wa M23 wemeje ko ibihe bishya byatangiriye mu mujyi wa Goma.

Kanyuka yavuze ko "Nyirantarengwa y’amasaha 48 yari yahawe abasirikare ba FARDC yarangiye," abasaba guhita bikoranyiriza muri Stade de l’Unité bitarenze saa cyenda z’ijoro.

Iri tangazo ryagarutse kandi ku bikorwa bihagaritswe, birimo ibikorerwa ku Kiyaga cya Kivu, mu gihe abaturage basabwe gutuza no kwirinda imyitwarire yose ishobora guhungabanya umutekano.

Uyu mutwe uvuga ko gufata Goma ari igisubizo ku magambo y’abaturage baharaniraga kubohorwa ihohoterwa ryavugwaga ko bakorerwaga n’abasirikare ba FARDC n’indi mitwe nka FDLR na Wazalendo.

Gufata Goma bije nyuma y’ibikorwa bikomeye uyu mutwe wakoze mu cyumweru gishize, birimo kwivugana Guverineri w’Intara ya Kivu ya Ruguru, Maj Gen Peter Chirimwami Nkuba, ndetse na Gen. Pacifique Ntawunguka, wari uzwi ku izina rya Omega, umuyobozi wa FDLR/FOCA.

Ibi byose, nk’uko bivugwa n’abahagarariye M23, bigamije gukuraho ibibazo byari byugarije aka karere no kubaka ubuyobozi bushya bugendera ku mahoro.

Kuri ubu, amaso ya benshi arahanzwe muri Goma, aho icyerekezo cy’umutekano n’ubuyobozi bw’aka karere kiri gutegerezwa n’abatuye RDC ndetse n’abakurikirana ibibera mu karere k’ibiyaga bigari.