Umunyamakuru Uwiringiyimana Peter yatandukanye na Flash FM.

Uwiringiyimana Peter, wari umaze imyaka itanu ari umunyamakuru wa siporo kuri Flash FM, yamaze kwerekeza kuri Ishusho TV. Uyu munyamakuru wari uzwiho ubuhanga mu gutanga amakuru ya siporo no kuyasesengura, agiye gutangira urugendo rushya muri televiziyo.

Amakuru yizewe agera kuri Ijambo.net yemeza ko Uwiringiyimana yahisemo gufata iyi ntambwe nshya agamije gukomeza gutanga umusanzu we mu iterambere ry’itangazamakuru ry’imikino mu Rwanda. Kuva yatangira kuri Flash FM mu myaka itanu ishize, yagaragaye nk’umwe mu banyamakuru bafite ijwi rikomeye mu rwego rwa siporo, cyane cyane mu itangazamakuru ry’amajwi.

Nubwo ataragira icyo atangaza ku mpamvu nyamukuru y’iyi mpinduka, bamwe mu bakurikiranira hafi itangazamakuru bavuga ko ishobora kuba ari amahirwe mashya y'iterambere kuri we. Ishusho TV, aho agiye gukomereza, izwi nk’imwe muri televiziyo zigezweho zitanga amakuru n’ibiganiro binyuranye byimbitse.

Kugenda kwa Peter kuri Flash FM ni igihombo kuri iyi radiyo, cyane ko yari umwe mu banyamakuru bakunzwe n’abakunzi ba siporo. Gusa, abafana be biteguye kumukurikira kuri televiziyo nshya.