Rusizi: Abanyeshuri biga kuri Gs Kibangira bari mu gihirahiro nyuma y’amage yabagwiriye.

Ishuri rya Gs Kibangira rihererye mu kagari ka Ryankana  mu Murenge wa Bugarama, ho mu karere ka Rusizi, ryasambuwe n’umuyaga mwinshi uvanze n’imvura, ibi bikaba byakomye mu nkokora abanyeshuri bahiga.

Iki cyago cyadukiriye iri shuri ku gicamunsi cyo kuri uyu Kane tariki ya 24 Ukwakira 2024, ku isaha ya saa munani n’iminota mirongo ine n’itanu z’amanwa.

Umuyobozi w’iri shuri , Niyimpagaritse Calixite ,yahamije ayamakuru avuga ko iyi mvura yaguye iminota micye, ariko ikangiriza byinshi aho uyu muyaga wasambuye ibyumba  bibiri by’ishuri gusa nta wahasize ubuzima .

Iyi mvura ivanze n’umuyaga yakomerekeje  byoroheje abanyeshuri batatu  bahise bajyanwa kwitabwaho kwa muganga

Ati ‘’Ibyumba byasambuwe ni bibiri kimwe muri byo nicyo kigirwagamo. Abanyeshuri batatu nibo  bakomeretse byoroheje kandi bari kwitabwaho n’abaganga.’’

Akomeza agira ati ‘’Turashaka ubundi buryo bwo kubona aho abanyeshuri bigira, bikimara kuba twahise duhumuriza ababyeyi n’abanyeshuri.’’

Abanyeshuri  1175 ni bo  biga muri Gs Kibangira.

Nsengimana Donatien.