APR FC mu mpinduka zikomeye: Godwin Odibo arasezerewe, Chidiebere mu gihirahiro cy’amasezerano.

APR FC ikomeje kugarukwaho cyane mu bitangazamakuru nyuma yo gutandukana ku bwumvikane n’Umunya-Nigeria Godwin Odibo, wari umaze amezi atandatu muri iyi kipe.

Uyu mukinnyi, wageze mu ikipe mu mpeshyi ya 2024, ntiyashoboye kwigarurira umwanya uhoraho mu mikino ya shampiyona, bituma ikipe n’umukinnyi bifata icyemezo cyo gutandukana.

N'ubwo APR FC yatandukanye na Odibo, ikibazo cy’umukinnyi Chidiebere cyo kiracyari urujijo. Uyu rutahizamu ukomoka muri Nigeria amaze iminsi mu biganiro byo kongera amasezerano ariko ntibarabasha kumvikana ku mpande zombi.

Iyi myanzuro yombi irerekana ko APR FC iri mu mpinduka zikomeye zishobora kugira ingaruka ku myiteguro y’iyi kipe mu mwaka wa 2025.

APR FC itandukanye n’uyu mukinnyi mu gihe imaze kwinjiza abandi babiri, aribo Hakim Kiwanuka na Denis Omedi bakina ku mpande imbere, aho aba Banya-Nigeria bari bazaniwe gutanga imbaraga.

Abakunzi b’iyi kipe ndetse n’abasesenguzi ba ruhago bakomeje kwibaza uko izo mpinduka zizahindura imikinire y’iyi kipe y’ubukombe mu Rwanda.