Mozambique : Umuyaga ukabije wiswe Chido wahitanye abarenga 34.

Ikigo cya Leta muri Mozambique gishinzwe kurwanya ibiza, cyatangaje ko inkubi y’umuyaga yiswe Chido yibasiye iki gihugu, imaze guhitana abantu 34 ndetse yangiza ibitari bike.

Iki kigo kivuga ko uyu muyaga uvanze n’imvura wabanje kwibasira Intara ya Cabo Delgado ku Cyumweru, uhica abantu 28.

Ibitanzamakuru birimo RFI ari na ho dukomora iyi nkuru byatangaje ko abandi bantu 3 bapfiriye mu Ntara ya Nampula, abandi 3 muri Niassa.

Kugeza ubu kandi abantu 319 nibo bamaze gutangazwa ko bamaze gukomerekera muri iyi nkubi y’umuyaga, yagendaga ku bilometero 260 ku isaha.

Uyu muyaga wageze muri Mozambique nyuma yo kwibasira ikirwa cya Mayotte giherereye mu nyanja y’u Buhinde, aho bikekwa ko wishe abatari bake.

Ibihugu birimo Malawi na Zimbabwe nabyo byaburiwe ko bishobora kwibasirwa n’iyi nkubi y’umuyaga ivanze n’imvura.