Koreya ya Ruguru yataje impagarara muri Koreya y'Epfo no mu Buyapani

Kuri uyu wa mbere tariki ya 22 Mata Koreya y'Epfo yatangajeko umuturanyi wayo Koreya ya Ruguru  yarashe  misile 'ballistique' yerekeza mu Nyanja ku nkombe zayo z'Iburasizuba.

Ibi kandi byagarutsweho n'abashinzwe umutekano ku nkombe y'Ubuyapani nabo bavuzeko Koreya ya Ruguru yarashe ikimeze nka misile "ballistique" hafi y'Ubuyapani. 

Televiziyo ya NHK yo yatangajeko icyo gisasu cyaguye hafi y'icyanya cy'inganda cy'u Buyapani.

Abayobozi bakuru b'ingabo bo muri Koreya y'Amajyepfo batangajeko icyo gisasu cyari icyo mu bwoko bwa "ballistique" bikaba ari ibisasu biraswa mu ntera ngufi biva hafi y'umurwa mukuru Pyongyang ariko nta makuru arambuye babivuzeho.

Ibi bitangajwe mu gihe andi makuru avugako kuri uyu wa mbere  Umuyobozi w'ingabo wa Koreya y'Epfo Myung-Soo yakiriye Umuyobozi w'ingabo za Amerika zishinzwe isanzure Gen Stephen Whiting kugirango baganire ku ikorwa ry'icyogajuru cy'ubutasi cya Koreya ya Ruguru n'ubufatanye mu bya gisirikare bukomeje gufata indi ntera hagati ya Koreya ya Ruguru n'Uburusiya.

Bivugwako Koreya ya Ruguru yaba iri hafi kohereza ikindi cyogajuru cy'ubutasi nyuma yuko mu Gushyingo umwaka ushize yohereje ikindi cyogajuru mu isanzure.

Bimaze kuba nk'akamenyero ko Koreya ya Ruguru igerageza ibisasu uko ibishatse kuko no muri Mata umwaka ushize yagerageje misire nshya ya hypersinoc igenda ku muvuduko ukubye uwijwi inshuro ziri hagati 5 na 25 mu rwego rwo gukomeza guteza imbere ibikorwa byayo byo gukora ibitwaro bya kirimbuzi.