Irushanwa rya Polisi y’u Rwanda mu mupira w’amaguru: Uko imikino y’umunsi wa mbere yagenze.

Kuri iki cyumweru, tariki ya 19 Mutarama 2025, hatangijwe ku mugaragaro irushanwa ry'umupira w'amaguru rihuza amashami atandukanye ya Polisi y’u Rwanda, rizwi nka Football Inter-Units Competition.

Iri rushanwa ry’umwaka wa 2025 ryitabiriwe n’amakipe 15, imikino y’umunsi wa mbere ikaba yarabereye ku bibuga bitandukanye mu gihugu hose. Mu mikino ine yabimburiye iyindi, amakipe ane yabashije kwegukana intsinzi n’amanota atatu, mu gihe andi yatahanye umusaruro utari mwiza.

Amakipe ya NPC, S. Region, TAFU, na E. Region yitwaye neza, aho kugeza ubu ariyo ayoboye amatsinda nyuma yo gutsinda imikino y’umunsi wa mbere.

Ni irushanwa rigamije gushimangira umuco wo gukorana neza mu nzego zose za Polisi no guteza imbere ubuzima bwiza binyuze muri siporo. Biteganyijwe ko imikino izakomeza mu minsi iri imbere, aho amakipe azakina asiganwa ku manota, hagamijwe kubona uzegukana igikombe.

Uko imikino y'umunsi wa mbere yagenze:

Southern Region 2-0 P/GHQs umukino wabereye kuri sitade ya Muhanga.

Ku Ruyenzi/Kamonyi: TAFU 3-0 SAPU

Mu Ishuri rikuru rya Polisi: NPC 4-1 Northern Region

PTS Gishari: Eastern Region 2-1 CTTC Mayange.

Ubwo yatangizaga iri rushanwa  mu ishuri rikuru rya Polisi (NPC) riherereye mu Karere ka Musanze; Commissioner of Police (CP) Rafiki Mujiji, uyobora iri shuri, akaba yari anahagarariye ubuyobozi bwa Polisi muri uyu muhango; yasabye abitabiriye iri rushanwa kurangwa n'ubworoherane bazirikana inshingano bafite nk'abapolisi.

Andi makipe 7 yari yaruhutse akaba azakina ku munsi wa kabiri ariyo;  Western Region, PTS&Band, AI, Central Region, TRS, SIF na Canine Brigade.

Imikino y'umunsi wa kabiri w'irushanwa izaba ku Cyumweru tariki ya 26 Mutarama, aho NPC izakina na W. Region, P/GHQs ihure na PTS&Band, CTTC Mayange ikine na C.Region naho TFU ikine na SIF.

Ni ku nshuro ya kabiri iri rushanwa rihuza amashami ya Polisi ribaye, iriheruka rikaba ryaregukanywe n'ikipe y'Ishuri rya Polisi ry'amahugurwa (PTS) rya Gishari  isezereye Western Region Police Unit.