DRC: Perezida Tshisekedi yavuguruye inzego za gisirikare.

Perezida Félix Antoine Tshisekedi wa Repubulika Iharanira Demokarasi ya Congo yagize Lieutenant Général Banza Mwilanié Jules umugaba mukuru w’Igisirikare (FARDC) naho Gen Christian Tshiwewe Songesa wari kuri izo nshingano, agirwa umujyanama wa Perezida mu bya gisirikare.

Izi mpinduka zagaragaye mu itangazo rya Perezidansi ya Repubulika Iharanira Demokarasi ya Congo ku mugoroba wo kuri uyu wa 19 Ukuboza 2024.

Gen. Tshiwewe yabaye Umugaba Mukuru w’Ingabo za RDC kuva mu Ukwakira 2022, nyuma yo gusimbura kuri izo nshingano Gen Celestin Mbala wohereje mu kiruhuko cy’izabukuru.

Mbere y’aho yari umuyobozi w’umutwe w’ingabo zishinzwe kurinda Perezida Félix Antoine Tshisekedi.

Tshiwewe yavanwe kuri ziriya nshingano mu gihe kuva azihawe ntacyo yigeze afasha ingabo za RDC ngo zibe zisubiza uduce tw’intara ya Kivu y’Amajyaruguru zambuwe n’inyeshyamba zo mu mutwe wa M23 bamaze imyaka itatu mu ntambara.

Itangazo ryaraye risomewe kuri Televiziyo y’Igihugu ya RDC rivuga ko Lieutenant Général Banza Mwilanié Jules ari we wagizwe Umugaba Mukuru w’Ingabo za Congo Kinshasa. Uyu agomba kungirizwa na Lieutenant Géneral Ichaligonza Nduru Jacques wagizwe Umugaba Mukuru w’Ingabo wungirije ushinzwe ibikorwa n’ubutasi.

Ichaligonza yasimbuye Géneral-Major Chico Tshitambwe wagizwe umuyobozi wa zone ya gisirikare y’Ingabo za RDC zikorera mu mujyi wa Kinshasa, ndetse no mu ntara za Kwango, Kwilu, Mai-Ndombe, kongo Central, Equateur, Mongala, Nord-Ubangi, Sud-Ubangi na Tshuapa.

Umuyobozi wa Zone ya gatatu ya gisirikare y’Ingabo zikorera mu ntara za Maniema, Kivu zombi,Bas-Uélé, Tshopo, Haut-Uélé na Ituri yagizwe Lieutenant-Général Pacifique Masunzu.

Mu zindi mpinduka: Général-Major Makombo Muinaminayi Jean Roger yagizwe umukuru w’ubutasi bwa gisirikare, asimbuye kuri izo nshingano Général-Major Christian Ndaywel wagizwe Umugaba w’Ingabo zirwanira ku butaka.

Géneral de Brigade Mulume Oderwa we yagizwe ushinzwe ibikorwa na ho Géneral de Brigade Mbuyi Tshivuadi agirwa ushinzwe imiyoborere muri FARDC.

Mu mpinduka Tshisekedi yakoze kandi: Géneral Mbangu Marcel yagizwe Umuyobozi w’Ikigo cya Gisirikare cya Kitona, na ho Dieudonné Muhima agira uw’icya Kamina.

Mu zindi mpinduka, Perezida Tshisekedi yazamuye mu ntera ba Géneral-Major: Banza Mwilambwe Jules, Kabamba wa Kasanda François na Kasongo Kabwit jean-Pierre abagira ba Lieutenant-Géneral, ba Géneral de Brigade: Malubuni Martin, Makombo Muinaminayi Jean Roger na Biagolo Ngondo Antoine abagira ba Géneral-Major; na ho ba Colonel: Katende Batubadila Benjamin, Maloba Mwila Eric, Monga Bondo Raymond Bart, Mpanga Mwamba Modeste na Muteteke Mutunda Jim abagira ba Géneral de Brigade.

Hari hashize icyumweru Tshisekedi agaragaje ko ikibazo cy’umutekano mucye urangwa mu burasirazuba bwa Congo afite icyizere ko kizakemurwa n’Ingabo z’Igihugu,  akaba yarongeyeho  ko impinduka yakoze mu gisirikare umwaka ushizerekana ko igisirikare cya Congo  cyizaahyira ku iherezo intambara ya M23.