Urukiko rwanzuye ko Fatakumavuta azaburanishwa ku itariki 5 Ugushyingo 2024.

Urukiko rw’Ibanze rwa Kicukiro kuri uyu wa 31 Ukwakira 2024, rwafashe icyemezo cyo gusubika urubanza rw’umunyamakuru Fatakumavuta ku busabe bw’uregwa. Ruvuga ko azaburanishwa ku itariki ya 5 Ugushyingo 2024.

Umunyamategeko wunganira Sengabo Jean Bosco uzwi nka Fatakumavuta yabwiye inteko iburanisha ko batabonye dosiye, bityo ko umukiriya we atiteguye kuburana.

Yasobanuye ko yamenyeshejwe itariki y’urubanza ariko ntibabashije kubona dosiye ariyo mpamvu basaba ko urubanza rwasubikwa.

Umushinjacyaha yabwiye inteko iburanisha ko ibivugwa n’uwunganira Fatakumavuta nta shingiro bifite. Icyakora yavuze ko bafite uburenganzira bwo gusaba gusubikisha urubanza rwo ku ifungwa n’ifungurwa ry’agateganyo.

Ku ruhande rw’ubushinjacyaha bwavuze ko uwunganira Fatakumavuta yahabwa umwanya urubanza rukaburanishwa uyu munsi tariki 31 Ukwakira 2024 bitewe nuko hari ubucucike muri za Kasho ndetse hakaba hari imanza nyinshi.

Uwunganira Fatakumavuta yabwiye Urukiko ko uburenganzira bw’uregwa bwo kumenya ibyo aregwa kugira ngo abashe kwitegura. Uwunganira Fatakumavuta yabwiye inteko iburanisha ko iyi dosiye yajyana uwo yunganira muri gereza bityo nta mpamvu yo kuyihutisha kuko uwo yunganira yagiye yongererwa ibyaha.

Umunyamategeko wa Fatakumavuta yasabye igihe gihagije cyo gutegura urubanza. Ni umunyamategeko wasabye ko mu gihe cyo kuburana ingingo y’ubucucike yagaragajwe n’ubushinjacyaha kuko yazashingirwaho mu kuburana ku ifungwa n’ifungurwa ry’agateganyo.

Urukiko rwanzuye ko urubanza ruzaburanishwa ku itariki 5 Ugushyingo 2024.