‘Umunyamakuru Fatakumavuta yarihanangirijwe arinangira’ Dr.Murangira B.Thierry.

Umuvugizi w’Urwego rw’Igihugu rw’Ubugenzacyaha, RIB, DR.Murangira B.Thierry yatangaje ko Fatakumavuta mbere yo gutabwa muri yombi yaganirijwe arinangira, ahishura n’ibyaha byose akurikiranweho.

Dr.Murangira yatangaje ko Sengabo Jean Bosco uzwi nka Fatakumavuta yatawe muri yombi akurikiranweho ibyaha birimo kubuza amahwemo abantu hifashishijwe imbuga nkoranyambaga.

Harimo kandi gukoresha imvugo ziremereye zikurura amacakubiri mu bantu zigambiriye no kubashyamiranya.

Yatangaje ko kuri ubu afungiye kuri sitasiyo ya RIB ya Kacyiru, dosiye ye ikaba iri gutegurwa kugira ngo ashyikirizwe ubushinjacyaha.

Umuvugizi wa RIB yavuze ko yafunzwe nyuma y’uko amaze iminsi aganirizwa ariko akaba yari yaranze guhinduka yarinangiye.

Dr.Murangira yagiriye inama abantu gukoresha imbuga nkoranyambaga mu buryo bukwiye, ndetse yihanangiriza abavuga ko Leta iri gukomeza ibintu mu myidagaduro, avuga ko uruganda rw’imyidagaduro atari akarwa ku buryo bikora ibyo bashaka.

Kugeza ubu Fatakumavuta afungiye kuri sitasiyo ya RIB ya Kacyiru.