Ubutasi bwa Amerika bwavumbuye igihugu giherutse kwinjira mu mabanga ya Donald Trump

Abategetsi b'ubutasi bw'Amerika bemeje ko Iran ari yo yari inyuma y'igikorwa giherutse kubaho cyo kwinjira muri mudasobwa z'ibikorwa byo kwiyamamaza bya Donald Trump ku mwanya wa perezida.

Urwego rw'ubugenzacyaha rw'Amerika (FBI) n'izindi nzego za leta basohoye itangazo bahuriyeho bavuga ko Iran yahisemo kwivanga mu matora y'Amerika mu rwego rwo "guteza amakimbirane no gutesha icyizere mu nzego za demokarasi zacu".

Itsinda rishinzwe ibikorwa byo kwiyamamaza kwa Trump ryatunze urutoki Iran ku itariki ya 10 Kanama  uyu mwaka ku kwinjira mu butumwa bw'imbere bwaryo. Abategetsi bo muri Iran barabihakanye.

Abantu bazi iby'iryo perereza babwiye igitangazamakuru CBS News, gikorana na BBC muri Amerika, ko bacyeka ko abinjira muri mudasobwa kwiba amabanga (aba 'hackers') b'Abanya-Iran banibasiye ibikorwa byo kwiyamamaza by'umukandida w'abademokarate ku mwanya wa perezida, Kamala Harris.

Amakuru avuga ko itsinda ry'ibikorwa byo kwiyamamaza bya Trump ryohererejwe ubutumwa bwo kuri 'email' bugaragara ko buvuye ku muntu wizewe bwo kubabeshya kugira ngo bakande kuri 'link', ubundi binjirirwa muri mudasobwa.

Mu cyumweru gishize, itsinda ry'ibikorwa byo kwiyamamaza bya Harris ryavuze ko na ryo ryibasiwe n'igitero nk'icyo, nubwo kitageze ku ntego.

Ibigo by'ubutasi byasohoye iryo tangazo ryo ku wa mbere, birimo FBI, ibiro by'umukuru w'ubutasi bw'Amerika, ikigo cy'umutekano wo kuri mudasobwa n'umutekano w'ibikorwa-remezo, byavuze ko amayeri yakoreshejwe "si mashya", ndetse byavuze ko Uburusiya na Iran byakoresheje uburyo nk'ubwo mu matora yabanje yo muri Amerika.

Ibinyamakuru The New York Times, Politico na The Washington Post byavuze ko byahawe amakuru y'ibanga y'imbere mu bikorwa byo kwiyamamaza bya Trump, arimo n'ajyanye n'itoranywa ry'uwo biyamamazanya nk'umukandida ku mwanya wa visi perezida, JD Vance. Kugeza ubu ibyo bitangazamakuru byanze gutanga amakuru arambuye.