Sobanukirwa ibigwi n’amateka by’umunyamakuru Jean Lambert Gatare witabye Imana

Jean Lambert Gatare, umwe mu banyamakuru b’abanyamwuga bamaze igihe kinini mu itangazamakuru ry’u Rwanda, yitabye Imana azize uburwayi. Amakuru y’urupfu rwe yamenyekanye mu gitondo cyo kuri uyu wa Gatandatu, tariki 22 Werurwe 2025, aho yaguye mu Buhindi, igihugu yari yaragiye kwivurizamo.

Ubuzima n’Ubunyamwuga bwa Jean Lambert Gatare

Jean Lambert Gatare yari umunyamakuru w’inararibonye, uzwi cyane mu Rwanda by’umwihariko kubera ubuhanga bwe mu kuvuga siporo, cyane cyane mu kogeza umupira w’amaguru. Yatangiye gukorera Radio Rwanda mu 1995, aho yakundwaga n’abatari bake kubera ijwi rye ryihariye n’uburyo yagezaga amakuru ku baturage.

Mu 2011, Gatare yavanyeho akabando kuri Radio Rwanda akomeza urugendo rwe mu itangazamakuru mu bindi bitangazamakuru birimo Isango Star n’ikinyamakuru cyandika cya Rushyashya, aho yabaye umuyobozi w’agateganyo nyuma y’urupfu rwa Burasa Jean Gualbert mu 2020.

Uburwayi bwamukuye mu kazi

Nubwo yari umwe mu banyamakuru bakunzwe, Jean Lambert Gatare yari amaze igihe atagaragara mu mwuga w’itangazamakuru kubera uburwayi yari amaranye igihe. Kubera uko ubuzima bwari bumeze, yagiye kwivuriza mu Buhindi, aho byarangiye yitabye Imana kuri uyu wa Gatanu tariki 21 Werurwe 2025.

Inkuru yashegeshe abamumenye

Urupfu rwa Jean Lambert Gatare ni inkuru yababaje benshi mu banyamakuru, abafana b’imikino ndetse n’abamwumvaga kuri radiyo. Ni umwe mu basize amateka mu itangazamakuru ryo mu Rwanda, by’umwihariko mu bijyanye no kogeza umupira w’amaguru.