Rutahizamu w'igikoko wa APR FC yayifashije kwandagaza Kiyovu Sports.

APR FC yatangiye imikino yo kwishyura ya Shampiyona y’Icyiciro cya Mbere 2024/2025 n’intsinzi, itsinda Kiyovu Sports ibitego 2-1 mu mukino wabereye kuri Kigali Pele Stadium, ku mugoroba wo kuri uyu wa Gatandatu tariki ya 8 Gashyantare 2025.

Ikipe ya APR FC yagaragaje imbaraga z’abakinnyi bashya yaguze mu igura n’igurishwa ry’iyi mpeshyi, barimo Denis Omedi watsinze ibitego byombi, Hakim Kiwanuka na Cheikh Djibril Ouattara.

Ku rundi ruhande, Kiyovu Sports idashoboye kugura abakinnyi bashya kubera ibihano bya FIFA, yakinanye abakinnyi bato bavuye mu Intare FC.

Uko umukino wagenze

Kiyovu Sports yafunguye amazamu ku munota wa 12 ku gitego cya Niyo David, ariko APR FC yishyura ku munota wa 26 ku gitego cya Denis Omedi, arongera atsinda ikindi cya kabiri ku munota wa 42.

Mu gice cya kabiri, APR FC yakomeje gusatira ariko inanirwa kongera igitego, mu gihe Kiyovu Sports nayo yabonye amahirwe yo kwishyura ariko umunyezamu Pavelh Ndzila akomeza kuba igihangange.

Urutonde rwa Shampiyona

APR FC yagumye ku mwanya wa kabiri n’amanota 34, irushwa na Rayon Sports iyoboye shampiyona n’amanota abiri, mu gihe Kiyovu Sports igumye ku mwanya wa nyuma n’amanota 12.

Imikino yindi yabaye:

·         Mukura 1-0 Muhazi United

·         AS Kigali 1-0 Bugesera FC

·         Rutsiro FC 0-0 Police FC

Abakinnyi babanjemo:

·         APR FC:

Pavelh Ndzila, Niyigena Clement, Niyomugabo Claude (c), Nshimiyimana Yunusu, Djibril Ouattara, Ndayishimiye Dieudonne, Lamine Bah, Hakim Kiwanuka, Denis Omedi, Ruboneka Bosco na Dauda Seidu. 

·         Kiyovu Sports:

Ishimwe Patrick, Ishimwe Eric, Byiringiro David, Kazindu Guy Bahati, Twahirwa Olivier, Mutunzi Dercy, Niyonzima David, Mosengwo Thaesere, Cherif Bayo na Ishimwe Kevin.