Rutahizamu Cheick Djibril Ouattara wasinyiye  APR FC ni muntu ki?

Ku wa Kabiri tariki 14 Mutarama 2025, ikipe ya APR FC yasinyishije rutahizamu ukomoka muri Burukina Faso, Cheick Djibril Ouattara, uheruka kwirukanwa na JS Kabylie yo muri Algeria.

Ku munsi wejo n’ijoro tariki 14 Mutarama 2025, nibwo amakuru y’uyu rutahizamu yagiye hanze aho bivugwa ko ikipe ya APR FC yamaze kurangizanya nawe akiyongera ku bandi bakinnyi 2 iyi kipe iheruka gutangaza.

Gibril Ouattara aheruka gusezererwa n’ikipe ya JS Kabylie yakiniraga guhera mu meshyi ya 2024, bivuze ko yari amaranye n’iyi kipe igihe cy’amezi 6.

Ouattara mu mikino 11 yakiniye iyi kipe yitwa JS Kabylie ibarizwa mu gihugu cya Algeria, ayivuyemo amaze gutsinda igitego 1 gusa ariko ayisiga ku mwanya wa 1 ku rutonde rwa shampiyona n’amanota 24.

Amazina ye yose yitwa Cheick Gibril Ouattara afite imyaka 25 kuko yavutse tariki 19 Nzeri 1999. Uyu mukinnyi yavukiye mu gace kitwa Bobo-Dioulasso mu gihugu cya Burkina Faso. Afite uburebure bungana na Metero 1 na sentimetero 84, akina nka nimero 9.

Ouattara yakiniye amakipe arimo vitesse FC kuva 2016-2017, yaje kandi no gukinira ASF Bobo Dioulasso kuva 2017-2018 ahita yerekeza muri RS Berkane kuva 2018 kugeza 2024. Muri iyi kipe yakinnye imikino 62 atsinda ibitego 6 gusa.

Akinira ikipe y’igihugu ya Brukina Faso

Cheick Djibril Ouattara w’imyaka 25 y’amavuko akinira ikipe y’igihugu ya Brukina Faso kuva tariki 24 Kanama 2018, aho amaze gukina imikino 14 yatsinzemo ibitego bibiri.

Uyu musore ariko mbere yo kugera mu ikipe y’igihugu nkuru, yananyuze mu batarengeje imyaka 20 aho mu 2019 mu mikino ya Afurika, yanafashije igihugu cye gutwara umudali wa zahabu ari we utsinze ibitego byinshi.

Uyu rutahizamu ikipe ya APR FC yamaze gusinyisha, aje yiyongera ku bagande 2 iyi kipe iheruka gutangaza barimo Hakim Kiwanuka ndetse na Denis Omedi.

Ikipe ya APR FC kugeza ubu iri ku mwanya wa 2 n’amanota 31 ku rutonde rw’agateganyo rwa shampiyona ruyobowe na Rayon Sports ifite amanota 36.