Rubavu: Abafatanyabikorwa basabwe kwigiranaho.

Ubuyobozi bw'Akarere ka Rubavu bwasabye abafatanyabikorwa kwigiranaho no guharanira guhanga udushya mu rwego rwo kurushaho gufasha umuturage kugera ku iterambere rirambye bafatanyije.

Ibi aba bafatanyabikorwa babisabwe ubwo hafungurwaga imurikabikorwa rya JADF Icyerekezo Rubavu kuwa 22 Mutarama 2025 mu karere ka Rubavu aho bagaragaje ibikorwa bitandukanye bakorera abaturage.

Mulindwa Prosper meya w'Akarere ka Rubavu yashimye uruhare rwabo mu kunganira gahunda zitandukanye Leta iba yateganyirije abaturage mu iterambere ryabo.

Yagize ati: ‘’Turashima uruhare rw'abafatanyabikorwa mu iterambere ry'Akarere ka Rubavu kuko rurigaragaza mu guhindura ubuzima n'imibereho y'abaturage n’inshingano dufatanya kuko Inkunga zabo ziza zunganira izo Leta igenara abaturage binyuze mu ngengo y'imari ya buri mwaka.

Iyi nyunganizi idufasha kurushaho kwesa imihigo no kugera ku gipimo kiruta icyo tuba twateganyije tukarushaho kwesa imihigo turabashimira."

Meya Mulindwa akomeza abamenyesha ko imurikagurishwa ari umwanya mwiza wo kwerekana ibyo bakora, babyereka abaturage aribo bagenerwabikorwa ndetse bagafata umwanya wo kuganira hagati yabo bafata umwanya wo kwigiranaho bivafasha kurushaho kunoza ibyo bakora.

Musenyeri Gahunde Felix Perezida w'Ihuriro ry'abafatanyabikorwa mu Iterambere ry'Akarere ka Rubavu JADF Icyerekezo yashimye abitabiriye avuga ko igihe cy'iminsi 3 bagiye kumurika uzaba umwanya mwiza ubafasha kugera kuri byinshi.

Yagize ati: "Iri murikabikorwa ni umwanya mwiza wo kugaragaza udushya dutandukanye no kwiga uko twarushaho kunoza serivisi kugira ngo umuturage arusheho kuba ku isonga icyo nsaba nuko twarushaho gutera intambwe."

Umwe mu bafatanyabikorwa bamuritse ibyo bakora ni Hand in Hand umuryango itegamiye kuri Leta wamuritse, ifumbire zo mu bwonko butandukanye, ibirayi bahinga mu mazi n'ikoranabuhanga ritandukanye bifashisha mu buhinzi bworozi.

Harindimana Benjamin umukozi wa Hand In Hand For Development (HIHD) agaragaza ibyo bakora yabwiye ikinyamakuru Ijambo.net ko kuri ubu mu rwego rwo kwegera abaturage bashima aho bageze bunguka abaterankunga babafasha kugera kuri byinshi bageza ku baturage.

Avuga ko kuri ubu bafite ubwo ko bwinshi bw'amafumbire bakora baje kumurika aho nyuma yo kuyatunganya bayageza ku baturage.

Ati "Dukorera mu mirenge itandukanye dufasha abaturage ku guhinga kinyamwuga, imurikabikorwa riradufasha cyane kuko rituma tubona umwanya wo kwerekana ibyo dukora, tugasangira amakuru n'abandi bafatanyabikorwa ikindi nuko twigiraniraho, tugatahana ubunararibonye." 

Bamwe mu bamuritse harimo abafite imiryango ifasha urubyiruko kugaragaza impano cyane mu mupira w'amaguru nka Africa Bora Ministries ikorera muri Nyundo na Rugerero, Imiryango irwanya amakimbirane, imiryango ifasha abafite Ubumuga n'ibindi bitandukanye aho bose bagera kuri 46.