Perezida Kagame yakosoye mugenzi we Ramaphosa wavuze ko ingabo z’u Rwanda ari inyeshyamba.

Perezida wa Repubulika y’u Rwanda, Paul Kagame, yavuze ko yakosoye Perezida wa Afurika y’Epfo, Cyril Ramaphosa, wavuze ko ingabo z’u Rwanda (RDF) ari “militia” (inyeshyamba), amubwira ko ibyo atari ukuri kuko ari ingabo zemewe z’igihugu cyigenga.

Ibi Perezida Kagame yabitangaje nyuma y’ibiganiro yagiranye na Ramaphosa ku kibazo cy’umutekano mu Burasirazuba bwa Repubulika Iharanira Demokarasi ya Congo (RDC).

Yavuze ko nyuma y’ibi biganiro, abayobozi b’Afurika y’Epfo, barimo na Ramaphosa, batanze amakuru anyuranye n’ibyavugiwe muri ibyo biganiro, aho bagaragaje u Rwanda mu isura mbi.

Kagame: Ingabo z’u Rwanda si militia

Perezida Kagame yasobanuye ko ingabo z’u Rwanda ari iz’igihugu kandi zuzuye ubunyamwuga, bityo kuba Ramaphosa yarazise "militia" ari ikosa rikomeye.

Yanenze uburyo Afurika y’Epfo igaragaza ko igira uruhare mu gukemura ibibazo by’umutekano muri RDC, nyamara ikaba igendera ku makuru y’ibinyoma.

Kagame yagize ati: “Niba ibyaganiriwe bigera mu biri butangarizwe abantu byahindutse, bigaragaza uko ibibazo bihari birimo no kwitabwaho.”

SADC na FDLR mu kibazo cy’umutekano muri RDC

Perezida Kagame yagarutse ku ruhare rw’ingabo za SADC (Southern African Development Community) zoherejwe muri Congo binyuze mu mutwe wa SAMIDRC.

Yavuze ko izi ngabo zitagiye muri RDC nk’izishinzwe kubungabunga amahoro, ahubwo zagiyeyo gufasha Leta ya Congo kurwana no gushyigikira umutwe wa FDLR, usanzwe ugamije guhungabanya umutekano w’u Rwanda.

Yanagaragaje ko izi ngabo za SADC zateye icyuho cy’ibiganiro byari bigamije gukemura ikibazo mu mahoro, ubwo zasimburaga ingabo z’Umuryango wa Afurika y’Iburasirazuba (EACRF), zari zagiyeyo mu rwego rwo guharanira amahoro.

Kagame yagaragaje uko Ramaphosa yisobanuye ku rupfu rw’ingabo z’Afurika y’Epfo

Perezida Kagame yagarutse no ku rupfu rw’ingabo z’Afurika y’Epfo ziheruka kugwa muri RDC. Yatangaje ko Perezida Ramaphosa ubwe yivugiye ko izi ngabo zitishwe n’umutwe wa M23, ahubwo “zishwe na FARDC (ingabo za Congo).”

Ibi bikaba bisobanuye ko amakuru atangwa na Leta ya Congo ku ntambara iri kubera mu Burasirazuba bwayo akwiye kwitonderwa. 

U Rwanda rwiteguye guhangana niba bibaye ngombwa

Perezida Kagame yasoje avuga ko u Rwanda rutiteguye kwemera guhindanywa, ashimangira ko niba Afurika y’Epfo ishaka kugira uruhare mu gukemura ibibazo by’umutekano muri RDC binyuze mu nzira y’amahoro, byaba ari byiza.

Ariko yongeyeho ati: “Niba Afurika y’Epfo bazahitamo guhangana, u Rwanda ruzakemura ikibazo muri ubwo buryo.”

Yanibajije impamvu abakuru b’ibihugu bya EAC bemeye ko ingabo z’uyu muryango ziva muri RDC hagasimbuzwa iza SADC, gusa kuko ari ko Perezida Félix Tshisekedi abyifuza.