Mozambique: Uruhande rutemera ibyavuye mu matora rwakajije imyigaragambyo.

Nyuma y’uko urukiko rw’ikirenga rushimangiye intsinzi y’umukandida Daniel Chapo w’ishyaka riri ku butegetsi mu matora ya perezida yabaye mu Kwakira  muri Mozambique, abari ku ruhande rw’Umukandida utavuga rumwe n’ubutegetsi bakomeje imyigaragambyo.

Iyi myigaragambyo yiciwemo abantu nyuma yuko umukandida wigenga wabaye uwa kabiri yanze kwemera ibyavuye mu matora nk’uko iyi nkuru dukesha BBC yabitangaje.

Venâncio Mondlane, wabaye uwa kabiri, ubu uri mu buhungiro, kuva amatora yaba yakomeje gusaba abamushyigikiye kwigaragambya bamagana amatora yavuze ko yabayemo uburiganya.

Kuri uyu wa Mbere, abigaragambya bumvikanye batera hejuru bavuga izina rye, batwika imipine y’imodoka, bafunga imihanda ndetse batera amabuye abapolisi n’abo basubizaga bakoresheje ibyuka biryana mu maso.