Menya ibihano bikarishye by’ubukungu  Donald Trump ashobora gukuriraho u Burusiya.

Umuryango w’Ubumwe bw’u Burayi uhangayikishijwe nuko Donald Trump ubura iminsi mike akinjira muri White House nka Perezida wa Leta Zunze Ubumwe za Amerika, ashobora gukuraho bimwe mu bihano by’ubukungu byafatiwe u Burusiya nyuma yuko butangije intambara muri Ukraine mu 2022.

Muri rusange, u Burusiya bwafatiwe ibihano bigera ku bihumbi 40 birimo ibihano by’ubukungu bikomeye, nko gufatira umutungo w’icyo gihugu ubitse mu bihugu by’amahanga nka Leta Zunze Ubumwe za Amerika n’u Burayi.

Icyakora ibyo bihano bishobora kuvaho mu minsi mike, cyane ko hari ubwoba bw’uko Trump ashobora gukuraho ibihano bimwe, ibishobora no kugira ingaruka zikomeye ku Mugabane w’u Burayi.

Abaganiriye na Financial Times bavuze ko batinya ko ibi bihano Trump azabikuraho kuko gusa byafashwe na Joe Biden, kandi akabikora atitaye ku ngaruka byagira ku Mugabane w’u Burayi.

Trump wifuza guhagarika intambara y’u Burusiya na Ukraine mu gihe gito gishoboka, bikekwa ko ashobora gukuraho bimwe mu bihano byafatiwe u Burayi, nk’uburyo bwo kugira ngo icyo gihugu cyemere guhagarika intambara kirimo muri Ukraine.

Ibihano byafatiwe u Burusiya bishingiye ku bintu bikomeye birimo ibikorwa bya gisirikare muri Ukraine, kwivanga mu matora y'Amerika, no guhonyora uburenganzira bwa muntu. Gukuraho ibyo bihano bisaba impamvu zifatika n'ubushake bwa politiki mu gihugu imbere.

Nubwo Trump yakunze kwerekana ubushake bwo kugira umubano mwiza n'u Burusiya, hari igitutu gikomeye muri Amerika no mu muryango mpuzamahanga gishobora kumubuza gukora ibyo byoroshye. Ibihugu by'inshuti za Amerika nabyo bishobora kotsa igitutu guverinoma ye ngo itareka ibyo bihano.

Mu buryo bw'umwihariko, Trump afite ubushobozi bwo gushyira igitutu kuri Kongere no kugerageza gukuraho ibihano byashyizweho n'iteka rya Perezida (Executive Orders), ariko ibihano byemejwe n'amategeko ya Kongere bishobora kuguma mu bikorwa niba nta bufatanye n'abagize Inteko Ishinga Amategeko.

Ibihano byafatiwe u Burusiya byagiye bifatwa mu byiciro bitandukanye mu bihe bitandukanye, byibanda ku bikorwa bitandukanye. Dore iby'ingenzi:

1. Ibihano byo mu 2014

U Burusiya bwigaruriye agace ka Crimea kari ka Ukraine ndetse n'ubufasha bw'u Burusiya ku barwanyi bo mu burasirazuba bwa Ukraine.

Ibihano: Leta Zunze Ubumwe za Amerika, Umuryango w’Ubumwe bw’u Burayi (EU), n’ibindi bihugu byashyizeho ibihano by’ubukungu birimo: Gufatira imitungo y’abantu n’ibigo bifitanye isano na guverinoma y’u Burusiya.

Guhagarika ubufatanye mu bijyanye n’ikoranabuhanga, ingufu, n’imizigo. Kubuza gucuruza na banki zikomeye z’u Burusiya.

2. Ibihano byo mu 2016

Icyegeranyo cyerekanye ko u Burusiya bwivanze mu matora ya Perezida wa Leta Zunze Ubumwe za Amerika mu 2016.

Ibihano: Gufatira imitungo y’abakozi b’urwego rw’iperereza rw’u Burusiya (FSB na GRU), no gufunga imitungo yabo muri Amerika.

3. Ibihano byo mu 2018

U Burusiya bukekwaho gukoresha ubumara bwo mu bwoko bwa Novichok mu bwicanyi bwabereye mu Bwongereza bwari bugamije kwica uwahoze ari maneko, Sergei Skripal.

Ibihano: Gukumira u Burusiya kubona ibicuruzwa by’ikoranabuhanga bikomoka muri Amerika no mu Bufaransa.

4. Ibihano byo mu 2022

Kuva muri Gashyantare 2022, u Burusiya bwatangije intambara yo kwigarurira Ukraine.

Ibihano: Gufatira imitungo y’abantu bakomeye muri guverinoma y’u Burusiya (abaherwe n’abayobozi), gukura u Burusiya muri gahunda yo gucuruza mpuzamahanga y’amabanki (SWIFT), kubuza kugurisha ingufu ziva mu Burusiya (nk’amakara, gaz, n’ibindi).

Ibihano bigenda byiyongera bitewe n’uko u Burusiya bukomeza gukora ibikorwa bifatwa nk’ibihungabanya umutekano wa Ukraine n’ibikorwa mpuzamahanga.