Impanuka y'indege ya Delta Air Lines i Toronto: Abagenzi 80 barokotse urupfu.

Ku wa Mbere, tariki ya 17 Gashyantare 2025, indege ya Delta Air Lines yakoze impanuka ikomeye ku kibuga cy'indege mpuzamahanga cya Toronto Pearson muri Canada. Iyi mpanuka yabaye mu masaha ya saa munani z'amanywa ku isaha ya Canada, ni ukuvuga saa tatu z'ijoro ku isaha y'i Kigali.

Amashusho yakwirakwijwe ku mbuga nkoranyambaga agaragaza iyo ndege yaguye igaramye, itangiye gushya, mu gihe abashinzwe kuzimya umuriro bahise batabara bakoresheje amazi n'ibifuro. Abagenzi n'abakozi b'indege bose uko ari 80 basohotsemo ari bazima, nubwo 15 muri bo bakomeretse, barimo batatu bakomeretse bikomeye, harimo umwana n'umugabo w'imyaka 60.

Umwe mu bagenzi yafashe amashusho y'ibihe by'impanuka, avuga ati: "Turi muri Toronto, indege yacu yakoze impanuka, iragaramye. Itsinda ry'abashinzwe kuzimya riri hanze."

Kompanyi ya Delta Air Lines yatangaje ko yababajwe n'iyi mpanuka, ivuga ko iri gukorana n'inzego z'umutekano mu iperereza rigamije kumenya icyateye iyo mpanuka. Ikigo gishinzwe iby'indege muri Amerika, Federal Aviation Administration (FAA), cyemeje ko abantu bose bari mu ndege babashije gusohoka, kandi ko ibikorwa byo gukusanya amakuru birimo gukorwa.

Ikigo cy'umutekano mu ngendo zo mu kirere muri Amerika, National Transportation Safety Board (NTSB), kiri gukorana n'ikigo gishinzwe umutekano w'ingendo muri Canada, Transportation Safety Board, mu iperereza ryimbitse ku byateye iyi mpanuka.

Nubwo iyi mpanuka yari ikomeye kandi iteye ubwoba, kuba abari mu ndege bose bararokotse ni igitangaza gikomeye, kandi ibikorwa by'ubutabazi byihuse byafashije mu gukumira ibindi byago.