Ikipe ya APR FC yirukanye Chidiebere Nwobodo na Odibo Godwin bayibereye ipfube.

Abanyanijeriya ‘Chidiebere Nwobodo na Godwin Odibo’ batandukanye n’Ikipe y’Ingabo z’u Rwanda, APR FC, nk’uko Ikinyamakuru BSNSports cyo muri Nijeriya dukesha iyi nkuru kibitangaza.

Aba bakinnyi bombi baguzwe n’Ikipe ya APR FC mu Mwaka w’imikino wa 2023-2024.

Mbere yo kugurwa na APR FC, Chidiebere yari Kapiteni w’Ikipe ya Enugu Rangers yanahesheje Igikombe cya Shampiyona. Mu gihe Godwin Odibo yakuwe mu Ikipe ya Sporting Lagos.

Aba bakinnyi bombi batandukanye na APR FC mu gihe bari bagisigaje Amezi atandatu ku masezerano, kuko yagombaga kurangira mu Mpeshyi y’uyu Mwaka w’i 2025.

BSNSports yatangaje ko barekuwe na APR FC mu gitondo cyo kuri uyu wa Mbere tariki ya 13 Mutarama 2025, nk’uko umwe mu bo muri APR FC utifuje ko amazina ye atangazwa yabihamirije iki kinyamakuru.

Aba bakinnyi bombi ntabwo bigeze bagirirwa ikizere n’umutoza mushya wa APR FC, Darko Novic ndetse na Thierry Forger wabatoje mu Mwaka wabo wa mbere, ntiyababonyemo abakinnyi ngenderwaho.

Umwe mu mikino aba bombi bagaragayemo, n’uwa gicuti wahuje APR FC na Gasogi United tariki ya 15 Ugushyingo 2024.

Uyu mukino wakiniwe i Shyorongi, warangiye APR FC itsinze Gasogi United ibitego 4-0.

Muri ibi bitego, birimo icyatsinzwe na Chidiebere Nwobodo, ibindi bitsindwa na Lamine Bah, Niyibizi Ramadhan na Victor Mbaoma.

Amakuru avuga ko iyi kipe y’Ingabo z’ Igihugu yatandukanye n’aba bakinnyi bombi bari barayigezemo bayihenze, nyuma yo kunanirwa kuyiha umusaruro bari bitezweho, Chiedebere na Odibo bombi basatira izamu baciye ku mpande, nta n’umwe muri bo wigeze atsindira APR FC igitego na Kimwe muri shampiyona.

Aba bakinnyi bombi ntabwo bigeze bagaragara ku mukino uheruka w’umunsi wa 15 wa Shampiyona ikipe ya APR FC yatsinzwemo n’Amagaju FC igitego 1-0.

Amakuru yatangajwe n’umunyamakuru Nkusi Denis ‘ Mtangazaji’ ukunze gukurikiranira hafi ibyo muri APR FC yatangaje ko aba bakinnyi bombi Mbere yo gusezererwa bahawe imperekeza y’amezi atandatu.

Kuri ubu APR FC iheruka gusinyisha Abagande, Denis Omedi na Hakim Kiwanuka byitezwe ko bagomba gusimbura bariya banya-Nigeria.