Gucuranga indirimbo ya Sudani mu cyimbo cy'iya Sudani y'Epfo byafashwe nk'agasuzuguro

Abategura imikino ya Olempike irimo kubera mu Bufaransa bacuranze indirimbo y'igihugu itari yo kuri Sudani y'Epfo, mbere yuko icyo gihugu gikina umukino wa mbere w'intoki wa basketball mu bagabo n'igihugu cya Puerto Rico.

Abarebaga uwo mukino wabereye ku kibuga Pierre-Mauroy basakuej cyan ubwo hacurangwaga indirimbo y'igihugu ya Sudani aho gucurangwa iya Sudani y'Epfo.

Nyuma yo kuyihagarika kwamaze akanya gato, amajwi yacecetse hacurangwa iya Sudani y'Epfo, nuko nyuma yaho imbaga y'abantu bari bari aho bahagurukira iyo kipe byo kuyiha icyubahiro.

Abateguye iyi mikino ya Olempike ibera mu murwa mukuru Paris w'Ubufaransa basohoye itangazo basaba imbabazi, bavuga ko byatewe no "kwibeshya kwa muntu".

Abateguye iyi mikino ya Olempike y'i Paris yo muri uyu mwaka wa 2024 basabye "imbabazi zivuye ku mutima ikipe yo muri Sudani y'Epfo n'abafana bayo ku bwo kwibeshya kwa muntu".

Itangazo abateguye iyo mikino basohoye ryongeraho riti: "Turumva neza uburemere bw'ikosa."

Ubu bubaye ubwa kabiri abateguye iyi mikino basaba imbabazi ku ikosa nk'iryo.

Mu muhango wo gutangiza iyi mikino wabaye ku wa gatanu, abakinnyi ba Koreya y'Epfo bibeshyweho batangazwa ko ari abakinnyi ba "Repubulika ya Rubanda ya Demokarasi ya Koreya" - izina ryo mu butegetsi rya Koreya ya Ruguru.

Uyu mukino warangiye Ikipe ya Sudani y'Epfo  itsinze Puerto Rico ku manota 90 ku manota 79.