Dore imyanzuro yose uko yakabaye yavuye mu nama ya EAC na SADC yigaga ku bibazo bya Congo.

Mu nama y’ingenzi yabereye hagati y’Umuryango wa Afurika y’Iburasirazuba (EAC) n’Umuryango w’Iterambere ry’Ibihugu byo mu Majyepfo ya Afurika (SADC), hafashwe imyanzuro ikomeye igamije gukemura ibibazo by’umutekano muke bikomeje gukaza umurego mu Burasirazuba bwa Repubulika Iharanira Demokarasi ya Congo (RDC).

Kwihutisha ihagarikwa ry’imirwano n’ubutabazi ku baturage

Inama y’ubufatanye yagaragaje impungenge ku bwiyongere bw’ubwicanyi n’imvururu zimaze gutwara ubuzima bwa benshi, cyane cyane abagore n’abana, mu Ntara zo mu Burasirazuba bwa RDC.

Abayobozi basabye guhagarika imirwano ako kanya no gushyiraho agahenge karambye, banibanda ku gutanga ubufasha bwihutirwa ku bagizweho ingaruka n’intambara, harimo no gusubiza abapfuye iwabo no gukura abakomeretse aho baherereye.

Muri iyi myanzuro, hagaragajwe ko imihanda minini y’ibikoresho nka Goma-Sake-Bukavu, Goma-Kibumba-Rumangabo-Kalengera-Rutshuru-Bunagana, ndetse n’inzira za Goma-Kiwanja-Rwindi-Kanyabayonga-Lubero igomba gufungurwa bidatinze kugira ngo ibikoresho by’ibanze n’ubutabazi bigere ku baturage.

Ikibuga cy’indege cya Goma nacyo cyategetswe gufungurwa ako kanya kugira ngo habeho koroshya itangwa ry’ubutabazi.

Guhuza inzira za Dipolomasi za Luanda na Nairobi

Inama yashimangiye ko gukemura ibibazo bya politiki n’ubufatanye bw’ibihugu ari bwo buryo burambye bwo gukemura amakimbirane mu Burasirazuba bwa RDC. Hashyizwe imbere guhuza inzira ya Luanda n’iya Nairobi kugira ngo hubakwe umuyoboro umwe w’ubufatanye mu biganiro bigamije amahoro arambye.

Abayobozi b’inama basabye ko ibiganiro hagati ya Leta ya RDC n’amatsinda atari aya Leta, harimo n’umutwe wa M23, byakomeza mu buryo bw’imbona nkubone mu rwego rwo gushaka ibisubizo binyuze mu nzira za dipolomasi.

Kurandura burundu umutwe w’iterabwoba no gukuraho ingabo z’amahanga.

Inama yasabye ishyirwa mu bikorwa ry’ingamba zo kurandura umutwe wa FDLR ndetse no gukuraho ingabo z’amahanga zitaratumiwe ziri ku butaka bwa RDC. Abayobozi bavuze ko ibi bizatuma igihugu kibasha kongera kugenzura umutekano wacyo no gusubiza abaturage amahoro.

Hemejwe kandi ko mu minsi 30 hazaterana indi nama y’abaminisitiri ba EAC na SADC kugira ngo basuzume raporo z’uko imyanzuro yashyizwe mu bikorwa, banategure umwihariko w’ingamba z’igihe gito n’ikirekire, harimo n’uburyo bwo kubona ingengo y’imari izashyigikira izi gahunda.

Kwihanganisha ababuze ababo no gukomeza kurengera abaturage.

Inama y’ubufatanye yanihanganishije imiryango yabuze ababo mu bitero biherutse kuba, inasaba Guverinoma ya RDC gukomeza kurinda ubuzima n’umutungo by’abaturage, ndetse no kubahiriza amahame y’uburenganzira bwa muntu n’amategeko mpuzamahanga.

Hanashimangiwe ko ibikorwa byo kurinda ibigo bya dipolomasi n’imiryango mpuzamahanga nka MONUSCO bigomba gukomeza kugira ngo habeho gukomeza ubutumwa bw’amahoro.

Ubutumwa ku baturage ba RDC

Abayobozi b’inama basoje basaba abaturage ba RDC gukomeza kugira icyizere mu nzira ya dipolomasi no gushyigikira ibikorwa bigamije amahoro. Bavuze ko ubufatanye bw’akarere ari bwo musingi w’amahoro arambye mu Burasirazuba bwa Congo.