Ambasaderi Olivier Nduhungirehe yatanze urugero rwiza rwo gushyigikira abahanzi.

Minisitiri w’Ububanyi n’Amahanga n’Ubutwererane, Ambasaderi Olivier Nduhungirehe, yagaragaje ko ashyigikiye iterambere ry’ubuhanzi nyarwanda ubwo yitabiraga igitaramo cyo kumurika album nshya ya Bruce Melodie yiswe Colorful Generation. Iki gitaramo cyabaye ku wa 21 Ukuboza 2024 muri Kigali Universe.

Iyi album yamaze kujya hanze, aho ubu iri ku rubuga rwumvirwaho indirimbo rwa Spotify, ndetse aba mbere bakaba bamaze kumva indirimbo z’uyu muhanzi Nyarwanda.

Minisitiri Nduhungirehe yaguze iyi album ku giciro cy’akayabo ka miliyoni imwe y’amafaranga y’u Rwanda (1,000,000 Frw), agaragaza ubwitange bwo gufasha abahanzi nyarwanda.

Yavuze ko Leta izakomeza gushyigikira ibikorwa nk’ibi, kuko bifasha igihugu kumenyekana ku rwego mpuzamahanga.

Bruce Melodie yashimiye uyu muyobozi ku gikorwa cy’indashyikirwa, avuga ko cyerekana agaciro Leta iha ubuhanzi.

Ibi ni urugero rwiza rw’uko ubufatanye bushobora guteza imbere umuco n’ubuhanzi mu Rwanda.

Minisitiri w’Ububanyi n’Amahanga n’Ubutwererane, ni umwe mu banyapolitiki bamaze iminsi bagaragaza ko bashyigikiye muzika nyarwanda, aho mu mpera z’umwaka ushize no mu ntangiro z’uyu, yitabiriye ibitaramo bigera kuri bine mu gihe cy’ibyumweru bine, birimo icya The Ben cyabaye ku Bunani tariki 01 Mutarama 2025 na we yamurikiyemo album ye.