Abanyeshuri 200 bo muri Sudan bageze mu Rwanda kuhakomereza amasomo nyuma y'intambara iyogoje iwabo

 Dr. Didace Kayihura Muganga, umuyobozi wa Kaminuza y'u Rwanda

Abanyeshuri 200 bo mu gihugu cya Sudan bageze muri Kaminuza y'u Rwanda kuri uyu wa 2 Kanama 2023 nyuma y'uko u Rwanda rubemereye imyanya muri Kaminuza kuko iwabo batabona uko biga kubera intambara.

Ni abanyeshuri biga ubuganga rusange ndetse no kuvura amenyo, bakazasubira iwabo amahoro yagarutse.

Umuyobozi wa UR, Dr Didas Kayihura Muganga  avuga ko aba banyeshuri boherejwe na Kaminuza ya University of Medical Sciences, ngo bahisemo kohereza abiga ubuganga kuko abiga mu yandi mashami babasha kubona izindi kaminuza muri iki gihugu ku buryo butagoye.

Uyu muyobozi akomeza avuga ko aba banyeshuri bahisemo kuza mu Rwanda, by'umwihariko abiga kuvura amenyo kuko basanze Kaminuza y'u Rwanda ifite ibikoresho bihagije kandi bijyanye n'igihe.

Aba banyeshuri bazanye n'abarimu babo b'abahanga, bazabakurikirana haba mu mashuri no mu bitaro aho bamwe bazaba bimenyereza.