Umutoza Erik Ten Hag yeretswe umuryango usohoka muri Manchester United.

Umutoza mukuru wa Manchester United Erik Ten Hag yirukanywe ku nshingano zo gutoza iyi kipe kubera umusaruro muke yagaragaje, ubu ikaba igiye gutozwa n’umutoza wungirije Ruud Van Nistelrooy.

Umuholande Erik Ten Hag yageze muri Manchester United mu mpeshyi ya 2022 asinya amasezerano y’imyaka itatu yari kurangira mu 2025 ariko ashobora kongerwaho umwaka.

Mu mpeshyi ya 2024 nibwo uyu mwaka yawongerewe aho yari kuzasoza amasezerano mu mpeshyi ya 2026, ibi bikaba bitaravuzweho rumwe n’abakunzi b’iyi kipe.

Gusa kuri uyu wa Mbere tariki 28 Ukwakira 2024, ni bwo iyi kipe yatangaje ko yandukanye nawe binyuze mu itangazo bashyize hanze.

Iryo tangazo ryagiraga riti “Erik Ten Hag yavuye ku mirimo ye nk’umutoza mukuru w’ikipe y’abagabo ya Manchester United. Turashimira Erik ku  byo yakoze byose mugihe yamaranye natwe kandi tumwifurije ibyiza ejo hazaza.”

Iri tangazo rikomeza rivuga ko Umuholandi wayikiniye nka rutahizamu Ruud Van Nestelrooy ari we usigarana inshingano zo gutoza ikipe by’agateganyo afashwa n’itsinda rindi ry’abatoza mu gihe hari gushakwa umutoza mukuru.

Umuholande Erik Ten Hag w’imyaka 54 y’amavuko, kuva yagera muri Manchester United  yatoje imikino 128 atsinzemo 70, anganya 23 mu gihe yatsinzwe 35. Impuzandengo yo kubona intsinzi ubwo yari ari umutoza w’iyi kipe, ingana na 55%.

Kugeza ubu iyi kipe ya Manchester United  iri ku mwanya wa 14 muri shampiyona n’amanota 11 mu mikino icyenda imaze gukina, mu gihe muri UEFA Europa League mu mikino itatu yose yayinganyije  bivuze ko afite amanota atatu gusa.

Nsengimana Donatien.