Rayon Sports yasubiriye Mukura VS iyinyabika ibitego 2-1.

Ni umukino wa gicuti wateguwe mu rwego rwo gufasha amakipe yombi kudasubira inyuma muri iki gihe Shampiyona yabaye ihagaze nyuma y’Umunsi wa Gatanu, bitewe n’imikino ibiri yo gushaka itike y’Igikombe cya Afurika cya 2025 ikipe y’Igihugu ‘Amavubi’ izakinamo na Bénin muri uku kwezi.

Ni umukino wabaye  kuri iki Cyumweru ubera kuri Kigali Péle Stadium. Abatoza  bombi  bari bakoze impinduka mu bakinnyi basanzwe babanzamo nk’amahitamo yabo ya mbere.

Kuru hande rwa Rayon Sports, Abanya-Sénégal, Fall Ngagne na Youssou Diagne batabonye amahirwe yo gukina bihoraho muri shampiyona, bari babanje mu kibuga.

Mukura VS ni yo yatangiye neza umukino, ndetse hakiri kare cyane, ku munota wa cyenda ifungura amazamu, ku cyatsinzwe na Sunzu Bonheur.

Nubwo Rayon Sports itaremaga uburyo bushobora kubyara igitego imbere y’izamu rya Mukura, ntibyayibujije kwishyura igitego yari yatsinzwe, aho Ndayishimiye Richard watereye ishoti inyuma y’urubuga rw’amahina, yabonye igitego bituma bajya kuruhuka ari igitego kimwe kuri kimwe .

Amakipe yombi yagarutse mu gice cya kabiri cy’umukino  afite umuvuduko wo gushaka igitego cya  kabiri, ariko kugira ngo  inshundura  zinyeganyege bikaba ingorabahizi.

Habura iminota mike ngo  umukino urangire, rutahizamu Fall Ngagne yahagurukije abakunzi ba Rayon Sports batari benshi, ubwo yatsindaga igitego cy’intsinzi. Ni igitego cyaturutse ku mupira wahinduwe na Bugingo Hakim, Ngagne ahita awushyira mu izamu n’umutwe.

Iminota mirongo 90 y’umukino  yarangiye ikipe ya Rayon Sports isubiriye Mukura VS nyuna yo kuyitsindira i Nyanza ibitego 2-1 mu mukino wa gicuti wabaye tariki ya 7 Nzeri, mu kwizihiza isabukuru y’imyaka 125 Umujyi wa Nyanza umaze ubayeho.

Aya makipe yombi azongera gucakirana mu mpera z’Ukuboza 2024, mu mukino w’Umunsi wa 15 wa Shampiyona uzabera i Huye.

Nsengimana Donatien.