APR FC yatsinze Visions FC, Mukura VS igarikira Police FC i Huye. Uko umunsi wa 9 wagenze.

Ikipe y’ingabo z’igihugu ibifashijwemo na  Mamdou Sy batsinze Visions FC 2-0 mu mukino w’umunsi wa cyenda wa Shampiyona wabereye kuri Kigali Pele Stadium kuri uyu wa Kane.

Uyu mukino wabaye ku mugoroba wo kuri uyu wa Kane tariki 7 Ugushyingo 2024, kuri Kigali Pele Stadium witabirwa n’Umugaba Mukuru w’Ingabo z’u Rwanda Gen Mubarakh Muganga n’Umuyobozi mushya wa APR FC Brig Gen Deo Rusanganwa.

APR FC yaje muri uyu mukino imaze imnsi ivugwamo amakuru menshi, harimo ko yari yaraye itewe mpaga ku mukino yanganyijemo 0-0 na Gorilla kubera gukinisha umubare utemewe w’abanyamahanga, mu gihe mbere y’umukino ari bwo byamenyekanye ko uwari Chairman wayo Col (Rtd) Richard Karasira yatandukanye na yo.

Umutoza w’iyi kipe Darko Novic ariko ntabwo yatewe impungenge n’amakuru yo hanze y’ikibuga, dore ko yatangiye isatira kuva ku munota wa kabiri w’umukino ari na ko yaremaga uburyo butandukanye bwo gutsinda itabyaje umusaruro.

Ku munota wa 10 ni bwo abakunzi ba Nyamukandagira nkuko bayita bazaga kwiterera mu kirere ubwo umusifuzi Eric Dushimimana yemezaga ko myugariro wa Vision yakoze umupira mu rubuga rw’amahina, maze Penaliti ivuyemo ikinjizwa neza na Mamadou Sy ku munota wa 11.

APR FC yagerageje gushaka igitego cya kabiri, gusa uburyo bwa Lamine Bah na Mamadou Sy babonye mu gice cya mbere ntibabubyaza umusaruro byatumye amakipe yombi ajya kuruhuka ari icyo gitego 1-0.

Mu gice cya kabiri, APR FC yakomereje aho yasoreje icya mbere, gusa na bwo bisaba Penaliti ya kabiri ya APR FC yemejwe n’umusifuzi wo ku ruhande Mugabo Eric, na yo ikaza kwinjizwa neza na Mamadou Sy wafunguraga ibitego bye muri Shampiyona.

Gutsinda uyu mukino, byatumye APR FC APR FC  igira amanota arindwi mu mikino ine imaze gukina ifata umwanya wa 14 na ho Vision FC yafashe umwanya wa 15 amanota atanu.

Ikipe y’Ingabo izagaruka mu kibuga ku Cyumweru tariki 10 Ugushyingo 2024, yakira Rutsiro FC mu mukino w’ikirarane cy’umunsi wa mbere wa Shampiyona.

Kugeza ku munsi wa cyenda wa shampiyona, Gorilla FC iyoboye n’amanota 18, ikurikiwe na Rayon Sports n’amanota 17 naho Police FC nii ya gatatu n’amanota 15.

Undi mukino wabaye kuri uwo munsi, Mukura VS yatsinze Police FC ibitego 2-0 mu mukino wabereye kuri Sitade Huye.

Nsengimana Donatien.