Police FC yasezereye Rayon Sports kuri penaliti, yisanga ku mukino wa nyuma uzayihuza na APR FC.

Kuri uyu wa Kabiri,Ikipe ya Police FC yatsinze Rayon Sports y’abakinnyii icumi kuri penaliti 3-1 mu mukino wa 1/2 cy’Igikombe cy’Intwari 2025 isanga APR FC ku mukino wa nyuma bagiye guhuriraho umwaka wa kabiri wikurikiranya.

Ni umukino Police FC yarushijemo Rayon Sports mu mikinire cyane cyane mu gice cya kabiri n’ubwo yabanje gutsindwa igitego ariko bitayiciye intege.

Mu gice cya mbere amakipe yombi yari aringaniye ariko ku munota wa 17 umunyezamu wa Rayon Sports Khadime Ndiaye atera umupira muremure wageze mu bwugarizi bwa Police FC maze umunyezamu Niyongira Patience wari wasohotse ngo awufate ananirwa kumvikana na myugariro we birangira Iraguha Hadji awubateranye mu izamu.

Mbere y’uko igice cya mbere cyongeyeweho iminota itanu kirangira, Police FC yatangaga akazi ku ruhande rwa Byiringiro Lague,hagati kwa Bigirimana Abedi na Allan Katerega yabonye koruneri.

Uyu mupira w’umuterekano watewe neza na Allan Katerega maze Umurundi Henry Msanga asumba ba myugariro bose ba Rayon Sports atsinda igitego cyo kwishyura cya Police FC, amakipe ajya kuruhuka anganya 1-1.

Rayon Sports mu gice cya kabiri ndetse no mukino wose yagowe no gukora uburyo bw’ibitego no kubakira umukino hagati hayo hari harimo abakinnyi babiri bugarira ari bo Niyonzima Olivier Seif na Kanamugire Roger.

Imbere ya bo hari Rukundo Abdoulham Paplay wari wasimbuye Muhire Kevin wavunitse ariko utakoze ibidasanzwe mu minota 45 ya mbere yakinnye ahubwo ubona ko iyi kipe ikumbuye uyu kapiteni wayo ufite imvune.

Ibi Police FC yabibyaje umusaruro yiharira igice cya kabiri n’ubwo nayo kubona igitego byayigoye cyane.Ku munota wa 73 umunyezamu wa Rayon Sports yakoze ikosa rikomeye ubwo yafataga umupira n’ikirenge hanze y’urubuga rw’amahina maze awinjizamo Byiringiro Lague arawuryamira gusa kubera igitutu awurenza umurongo uvamo koruneri.

Mu buryo butunguranye Khadime Ndiaye yaretse umupira ahita agaruka yiruka kuri Lague amukubita ibiganza mu mutwe amuhereye inyuma bose baryama hasi.

Bitaweho bombi iminota itatu maze ku munota wa 76 bahagurutse umusifuzi Nsabimana Celestin aha uyu munyezamu ikarita itukura ,Rayon Sports ihita ikuramo Iraguha Hadji ishyiramo umunyezamu Ndikuriyo Patient.

Iminota yari isigaye iyi kipe yirwanyeho ari nako Police FC nayo ishaka igitego cy’intsinzi ariko iminota irangira bikiri 1-1 bongeraho indi irindwi nayo yarangiye uko hitabazwa penaliti.

Penaliti ya mbere yatewe na Hakizimana Muhadjili wari winjiye mu kibuga asimbura ku ruhande rwa Police FC ayitera hejuru,Youssou Diagne wa Rayon Sports wakurikiyeho nawe umunyezamu Patience ayikuramo,Allan Katerega wa Police FC arayinjiza,Serumogo Ali wa Rayon Sports arayinjiza,Ani Elijah wa Police FC arayinjiza, Omar Gning wa Rayon Sports arayihusha, Mugisha Didier wa Police FC arayinjiza ,Aziz Bassane wa Rayon Sports asoza nawe ayihusha, umukino urangira Police FC itsinze penaliti 3-1.

Police FC ifite iki gikombe mu 2024 ku mukino wa nyuma uteganyijwe tariki 1 Gashyantare 2025 izahurira na APR FC n’ubundi yahatsindiye icyo gihe ibitego 2-1.

APR FC yabonye itike y’umukino wa nyuma itsinze AS Kigali 2-0, umukino wabereye kuri Kigali Pele Stadium.

Muri uyu mukino watangiye ku isaha ya saa cyenda zuzuye,ikipe ya APR FC mu bakinnyi babanjemo hari harimo babiri bashya,Denis Omedi na Hakim Kiwanuka mu gihe kuri AS Kigali Haruna Niyonzima nawe mushya yakinnye iminota yose.

Igice cya mbere cyari kiringaniye ku mpande zombi n’ubwo APR FC yagitangiye ariyo ubona ko yubaka umukino neza ariko AS Kigali nyuma y’iminota 25 nayo wabonaga imaze gutuza yatangiye kubaka umupira wa yo ariko ku mpande zombi habura iyabona igitego bajya kuruhuka banganya 0-0.

Mu gice cya kabiri ku munota wa 55 APR FC yubatse uburyo maze banyuza umupira ibumoso ufatwa na Mugisha Gilbert wari winjiye mu rubuga rw’amahina awugarura muri penaliti usanga Mahmadou Lamine Bah ahagaze neza arebana n’izamu atera ishoti rigana mu izamu ariko Akayezu Jean Bosco awukuzamo igihimba.

Aha, umusifuzi yavuze ko yawukoze n’amaboko impaka zatwaye iminota itatu,AS Kigali batabyemera.

Ku munota wa 58 nibwo penaliti yatewe na rutahizamu mushya ukomoka muri Uganda Denis Omedi atsindira APR FC igitego cya mbere. Ku munota wa 76 APR FC yakuyemo Denis Omedi, Mahmadou Lamine Bah na Hakim Kiwanuka ishyiramo Niyibizi Ramadhan,Tuyisenge Arsene na Dushimimana Olivier.

Kugeza kuri uyu munota APR FC yakinaga neza AS Kigali nayo ishaka kwishyura ariko Byiringiro Gilbert wari winjiye asimbura ku ruhande rw’ibumoso inyuma bikomeza kumugora. Ku munota wa 79 APR FC yabonye kufura yatewe na Niyibizi Ramadhan mu buryo bwiza atsinda igitego cya kabiri cya APR FC cyanasoje umukino itsinze 2-0.

APR FC izahura na Police FC ku mukino wa nyuma, n’ubwo Rayon Sports yari yiriwe yitegura kuzakina umukino wa nyuma, aho abayobozi bayo bari bari kwinginga mukeba-APR ngo itsinde maze bazasakirane bayumvishe. Byarangiye rero ahubwo Rayon Sports ari yo ibuze ku munsi w’ubukwe buteganyijwe ku ya mbere Gashyantare.