Kenya hari umwuka mubi nyuma y’icyemezo cyogukuraho ifunguro ry’ubuntu ku basirikare.

Muri Kenya, Guverinoma yahagaritse ifunguro ry’ubuntu ryagenerwaga abasirikare ba Kenya, KDF, ku manywa, hashyirwaho gahunda yo kujya umuntu yiyishyurira uko agiye gufata iryo funguro, iyo gahunda ikaba yiswe ‘PAYE’(Pay-As-You-Eat).

Guverinoma ya Kenya yafashe icyemezo cyo guhagarika iyo gahunda yo gutanga ifunguro rya ku mwanywa ku basirikare, icyo cyemezo kikazatangira kubahirizwa guhera ku itariki ya 1 Nyakanga 2025.

Bivugwa ko nyuma yo gutangaza icyo cyemezo, cyakuruye umwuka mubi muri bamwe mu basirikare, ariko cyanavuzweho na bamwe mu bakoresha imbuga nkoranyambaga aho muri Kenya.

Ibinyujije muri Minisiteri y’Ingabo, Guverinoma ya Kenya yatangaje ko igiye guhindura iyo gahunda yo gutanga ifunguro rya ku manywa ku basirikare ku buntu, nubwo yari imaze imyaka myinshi ikorwa mu gisirikare cya KDF.

Iyo gahunda ivugwaho kuba yazamuye amarangamutima ya bamwe mu basirikare ba Kenya, yajyaga ikorwa mu rwego rwo kugira ngo buri musirikare abone ifunguro rikwiye kandi rihagije, hatitawe ku ho akorera akazi, cyangwa se ku ngano y’umushahara we.

Gen Major Mohammed Nur Hassan, washyize umukono kuri icyo cyemezo, ku itariki 17 Mutarama 2025, yavuze ko cyafashwe mu gihe byari bimaze kugaragara ko iyo gahunda yifitemo ibibazo, Guverinoma ikaba yemeza ko iyo gahunda nshya ya PAYE izafasha mu kugena neza ingengo y’imari, ariko ikazanafasha abasirikare kumenya ifunguro bahitamo gufata, bijyanye n’icyo umuntu ku giti cye ashaka, bityo bigabanye ibihombo bimwe na bimwe byajyaga bibaho.

Ikinyamakuru Citizen Digital na Sunday Nation, byatangaje ko icyo cyemezo cyahangayikishije bamwe mu basirikare cyane cyane abafite imishahara mito, cyangwa se bafite inguzanyo muri za banki, bavuga ko ubu hari undi mutwaro ubasaba amafaranga ugiye kwiyongera ku yo bari bafite.

Mu rwego rwo kurushaho guhumuriza abo basirikare, Minisiterii y’Ingabo ya Kenya, yatangaje ko iyo gahunda nshya yo kwiyishyurira ifunguro rya ku manywa, izajya ikorwa n’abari mu bice birimo amahoro gusa, ariko ko abari mu butumwa, abari mu myitozo, bazakomeza kujya bahabwa iryo funguro ku buntu, hakurikijwe iyo gahunda isanzweho.

Bamwe mu banya-Kenya bakoresha imbuga nkoranyambaga bagize icyo bavuga kuri icyo cyemezo, ko abasirikare bashobora kuzajya bahitamo kujya kugura ibyo kurya bibahendukiye, ariko bitagira intungamubiri, bityo bikagira ingaruka mu buzima bwabo, bakaba batakaza ubushobozi bwo gukomeza kubungabunga umutekano w’igihugu.

Ni icyemezo gifashwe mu gihe Kenya ihanganye n’ikibazo cy’ubukungu butifashe neza, aho yatangaje ko irimo igabanya ikoreshwa ry’imari ya Leta mu nzego zitandukanye, ariko abo bakoresha imbuga nkoranyambaga bamwe, banenze ko Leta yahisemo kugabanya ibiyihenda, ariko igashyira ubuzima buhenze ku bashinzwe kurinda igihugu.

Uwitwa @MoGAbdi ku rubuga rwa X, yagize ati "Guhagarika gahunda yo gutanga ifunguro ry’ubuntu rya ku manywa ku basirikare ba KDF ni isoni, kuko nibo bashyira ubuzima bwabo mu kaga aho rukomeye, barinda igihugu cyacu. Abasirikare bashonje ntabwo barinda umutekano uko bikwiye”.

Uwitwa @itsdylanke we yagize ati "Ubwo KDF izajya irya KDF nyine".

Uwitwa @anonymousba254 ati "KDF ni ingabo zikomeye, guhindagura inkingi zatumaga batsinda neza ibitego, hirya no hino, bizamura ibibazo bitari ngombwa. Ibi ni ibintu bito bito bitari bikwiye”.

Uwitwa @wanykimaina we yagize ati "Ariko se, ni ryari imitungo y’abanyapolitiki yo izatangira kujya igerwaho n’ingaruka z’ibyemezo nk’ibyo?”