Korea ya Ruguru igiye gukora za misile zikaze nyuma y'uko USA na Korea y'Epfo bagiye kumurika ibisasu

Kim Jong Un uyobora Korea ya Ruguru yategetse ko abakozi be bakora za misile kugira ngo bongere imbaraga z'igisirikare cy'iki gihugu kandi bitegure intambara.

Ni nyuma y'uko Korea y'Epfo na Leta zunze Ubumwe z'Amerika bateganya gukora imyiyerekano ya gisirikare y'umwaka.

Kim yatanze iri tegeko ubwo yasuraga ububiko bw'intwaro z'iki gihugu n'inganda za misile, ibimodoka by'intambara n'imbunda za rurtura kuri uyu wa 11 Kanama 2023.

Reuters itangaza ko impamvu yategetse kongera ubwinshi bw'intwaro ngo abona kuba Leta Zunze Ubumwe z'Amerika zigiye gukorana na Korea y'Epfo imyiyerekano ya gisirikare biri mu rwego rwo kwitegura intambara yo gutera Korea ya Ruguru.

Kim yavuze ko intego yo kongera ibi bitwaro ari ukugira ngo igihugu cye kiryamire amajanja kandi kibe cyizeye ko isaha n'isaha cyagabwaho ibitero cyabasha guhangana.

Yagize ati "Kwitegura intambara neza bijyana no kuba ufite ububiko bw'intwaro bwizewe kandi buteye imbere, ufite inganda zikora ku buryo bufatika intwaro zigezweho zagufasha kurwana intambara."

Kim yasuye ahakorerwa ibifaro ashima uko imirimo iri kugenda, avuga ko bikiwiye kugira ibifaru n'ibimodoka birasa kure hashoboka.

Korea y'Epfo na Letab Zunze Ubumwe z'Amerika bavuze ko bazakora imyiyerekano y'ubwigenge bwa Ulchi kuri uyu wa 21 Kanama 2023 mu rwego rwo kongera imbaraga zibasha gubiza Korea ya Ruguru ikunze koherezayo za misisle.