Ese virusi ya Marburg yaba yongeye gukaza umurego? Icyo imibare mishya ya MINISANTE yerekana.

MINISANTE  yongeye gutangaza ko  hongeye kugaragara undi muntu mushya wanduye indwara ya Marburg, watumye imibare y’abari kuvurwa izamuka nyuma yo kuva kuri umwe, ubu akaba ari batatu.

Ni imibare mishya Minisiteri y’Ubuzima yatangaje kuri uyu wa Kane tariki 24 Ukwakira 2024 igaragaza uko virusi ya Marburg ihagaze kugeza ubu.

Uyu mu rwayi wagaragaye mushya akaba yabonetse  mu bipimo bishya 69 ari na byo byabonetsemo umuntu umwe ufite ubwandu bw’iyi ndwara igiye kuzuza ukwezi igaragaye ku butaka bw’u Rwanda.

Iyi mibare igaragaza ko kugeza ubu abamaze gusanganwa iyi ndwara kuva yagera mu Rwanda, ari 64 barimo uyu mushya, ikaba imaze guhitana abantu 15 ariko kuri uyu wa Kane, ikaba ntawe yahitanye.

Ni mu gihe abamaze kuyikira ari abantu 46, nabwo kuri uyu wa Kane, nta n’umwe wakize.

Ibipimo bimaze gufatwa byose hamwe, ni 5 074 birimo ibi 69 byafashwe ku wa Kane ari na byo byabonetsemo umuntu umwe wanduye.

Kugeza ubu hamaze gukingirwa abantu 1 302 barimo 18 bakingiwe kuri uyu wa Kane.

Nsengimana Donatien.