Urupfu rwa Gén. Ntawunguka ‘Omega’: Iherezo ry’umwe mu bayobozi b’intagondwa ba FDLR.

Urupfu rwa Gén. Ntawunguka Pacifique, uzwi nka Omega, wari Umuyobozi Mukuru w’Igisirikare cya FDLR-FOCA, rwabaye inkuru ikomeye mu karere k’Ibiyaga Bigari.

Omega yaguye mu mirwano mu gace kari hagati y’Ugogwe na Gitsimba, hafi y’ikirunga cya Nyiragongo, nyuma yo kugabwaho igitero n’inyeshyamba za M23.

Ibi byabaye mu gihe umutwe wa FDLR ukomeje guhura n’ibibazo bikomeye by’ibitero ndetse no gutakaza abayobozi bakuru bawo.

Gén. Omega yari umwe mu bayobozi bakomeye kandi b’intagondwa mu mutwe wa FDLR. Yavukiye muri Ngororero mu 1964, yize amashuri yisumbuye i Nyanza, akomereza mu Ishuri Rikuru rya Gisirikare ESM, ndetse akabona amahugurwa mu gutwara indege mu Bufaransa.

Nyuma y’intambara yo mu 1994, yahungiye muri Congo, aho yakomeje ibikorwa bye bya gisirikare, mbere yo kuba umuyobozi mukuru wa FDLR mu 2019.

Uyu mugabo yari azwiho kutava ku izima no kugundira imyanya y’ubuyobozi, ibintu byatumaga agirana amakimbirane na bagenzi be. Kuba yarahisemo gukomeza urugamba aho gutahuka mu Rwanda byamugizeho ingaruka zikomeye.

Leta y’u Rwanda yamwinginze kenshi ngo agaruke mu gihugu, ariko yanga, atangaza amagambo agaragaza ingengabitekerezo mbi. Mu magambo ya Gen James Kabarebe, Omega yigeze kuvuga ko azagaruka mu Rwanda “nta Mututsi n’umwe ukirurimo,” ibintu Kabarebe yamusubije ko bitazashoboka, ahubwo azagwa mu mashyamba ya Congo.

Urupfu rwa Gén. Omega ruje rukurikira urwa bagenzi be barimo Gén. Mudacumura na Gén. Hakizimana Apollinaire, bikaba bigaragaza icyerekezo gihungabanye cy’umutwe wa FDLR.

Ni urugero rukomeye rw’uko gucika intege k’uyu mutwe kwigaragaza umunsi ku wundi, bitewe n’intambara n’amakimbirane y’abayobozi bawo.