Uko Mazimpaka Hervé ayoboye imyigaragambyo i Burayi isaba ko Ingabire Victoire arekurwa

Mu murwa mukuru w’u Bubiligi, Brussels, kuri uyu wa Gatanu habereye imyigaragambyo yateguwe n’Abanyarwanda baba mu mahanga ndetse n’inshuti zabo, igamije gusaba ko Ingabire Victoire, umunyapolitiki utavuga rumwe n’ubutegetsi bw’u Rwanda, arekurwa. Iyi myigaragambyo yabaye nyuma y’uko Urwego rw’Igihugu rw’Ubugenzacyaha (RIB) rutangaje ko rwataye muri yombi Ingabire, rukamukurikirana ku byaha bikomeye bifitanye isano no guhungabanya umutekano w’igihugu.

Mu bagaragaye muri iyo myigaragambyo harimo abamenyerewe mu bikorwa byo kunenga ubutegetsi bwa Kigali, barimo Mazimpaka Hervé, umwe mu bayobozi ba FDU-Inkingi, wanamenyekanye cyane mu bikorwa byo kwamagana ubuyobozi bw’u Rwanda ku mbuga nkoranyambaga. Yari kumwe na Placide Kayumba, umuyobozi w’ishyaka FDU-Inkingi, Niyibizi Michael ushinzwe ibikorwa bya Sit-In Movement, ndetse na Musabyimana Gaspard, umunyamakuru uri mu buhungiro.

Mazimpaka Hervé, wamenyekanye kuva akiri umunyeshuri mu Ishuri ry’Imyuga n’Ubumenyingiro rya IPRC Kigali, yakunze kunengwa kubera amagambo ye asebya igihugu mu ruhame, mbere y’uko ahungira mu Burayi. Muri iyi myigaragambyo, yagaragaye yambaye umupira uriho ifoto ya Ingabire Victoire, asaba ko “urugamba rwa demokarasi rutagirwa icyaha”.

Abo bigaragambije bashyize ku mugaragaro imyambaro, ibyapa n’indangururamajwi bigaragaza ko bamagana iyifatwa rya Ingabire, bavuga ko ari igikorwa cya politiki kigamije gukumira ubwisanzure mu bitekerezo.

Ku ruhande rw’u Rwanda, RIB iherutse gutangaza ko yataye muri yombi Ingabire Victoire ku wa Kane w’icyumweru gishize, aho ubu afunzwe by’agateganyo. Ubugenzacyaha bwatangaje ko bumukurikiranyeho ibyaha birimo gushaka guhirika ubutegetsi, gushishikariza rubanda imvururu, ndetse no kurema umutwe w’abagizi ba nabi. Ingabire yari asanzwe azwi nk’umuyobozi w’ishyaka DALFA-Umurinzi, ritaremerwa n’amategeko y’u Rwanda.

Mu butumwa bushobora gufatwa nk’ubujyanye n’ibi bikorwa byo mu mahanga, Perezida wa Repubulika y’u Rwanda, Paul Kagame, aherutse kugira amagambo akomeye abwira abashaka guharabika igihugu. Mu muhango wo gutangiza icyumweru cy’Icyunamo ku ya 7 Mata 2025, yagize ati: “Abakangisha u Rwanda ibihano n’abakomeje kurushinja ibinyoma bakwiriye kujya mu kuzimu. Go to hell, just go to hell.”

Aya magambo akakaye yafashwe nk’ubutumwa bugenewe abategura ibikorwa byo kwamagana Leta hanze y’igihugu, cyane cyane abakoreshwa n’amahanga mu mugambi wo guhungabanya ituze n’umutekano.

Bamwe mu basesenguzi bavuga ko imyigaragambyo nk’iyi ishyira igitutu ku Rwanda mu rwego mpuzamahanga, ariko ku rundi ruhande igashimangira ubudahangarwa bw’igihugu mu guhangana n’ibigeragezo byaba iby’imbere mu gihugu cyangwa ibyifuzwa guhindurwa binyuze hanze.

Ibyemezo ku ifungwa rya Ingabire Victoire biracyategerejwe n’inkiko. Ubutabera bw’u Rwanda bwatangaje ko bizakorwa mu mucyo, hakurikijwe amategeko.

Nsengimana Donatien |Ijambo.net