Mu masasu menshi cyane FARDC yisubije agace ka Kalembe nyuma yogutsinsura ingabo za M23.

Igisirikare cya Leta ya Congo cyatangaje ko cyavanye inyeshyamba za M23 mu gace ka Kalembe. Ni nyuma y’amakuru yemezaga ko umutwe wa M23 wafashe aka gace nyuma y’imirwano yabaye ku cyumweru.

Ku wa mbere, bamwe mu bahagarariye Teritwari ya Walikale bemeje imirwano yabaye ku cyumweru n’ifatwa ry’agace ka Kalembe kari hafi y’urubibi rwa teritwari za Walikale na Masisi z’Intara ya Kivu ya Ruguru.

Radio Okapi iterwa inkunga na ONU ivuga ko imirwano yubuye ku wa mbere ahagana saa yine z’amanywa muri ako gace hagati ya M23 n’imitwe ya Wazalendo ifatanya n’ingabo za leta.

Ku wa mbere nimugoroba igisirikare cya FARDC cyatangaje ko cyavanye M23 muri Kalembe kandi ko “FARDC igenzura byuzuye ako gace” nyuma y’uko “benshi mu bagize umutwe wa  M23 basubiye inyuma bagana i Masisi.’’

Intambara mu burasirazuba bwa DR Congo yadutse bushya mu mpera y’umwaka wa 2021, yatumye abantu barenga ibihumbi 500 bava mu byabo mu gihe abasivile batazwi neza umubare baburiye ubuzima muri iyo ntambara, ubucuruzi n’ubuhahirane hagati y’u Rwanda na DRC nk’uko  BBC yabyanditse.

Donatien Nsengimana.