Mu Rwanda abantu 58 ni bo bamaze kwandura virusi ya Marburg.

Ku wa Gatatu tariki ya 9 Ukwakira, Minisiteri y’Ubuzima yatangaje imibare mishya igaragaza uko icyorezo gikwirakwizwa na virusi ya Marburg gihagaze kuva cyagaragara mu Rwanda.

MINISANTE  yatangaje ko  ku munsi wejo nta muntu wishwe n’indwara ya Marburg, nta wakize, nta n’uwanduye mushya wabonetse.

Indwara ya Marburg mu Rwanda imaze kuboneka mu bantu 58. Abantu 13 muri bo barapfuye, 12 barakize, abandi 33 barimo kuvurwa.

Minisiteri y’Ubuzima isobanura ko kuva hatangazwa ko indwara ya Marburg yageze mu Rwanda, abarwayi bashya n’abo bahuye bagiye baboneka muri bimwe mu bitaro byo mu Mujyi wa Kigali, bose bashyizwe mu kato kandi bitabwaho n’abaganga.

MINISANTE kandi  yavuze ko ibipimo bifatwa bigaragaza ko iyi ndwara itari yakwirakwira  mu Gihugu hose bityo ko tugomba kwirinda dukurikiza amabwiriza ya Minisiteri y’Ubuzima.

Donatien Nsengimana.