Ikoranabuhanga rya E-UBUZIMA rizaba ryageze mu mavuriro yose mu bitarenze uyu mwaka

Minisiteri y’Ubuzima yatangaje ko bitarenze uyu mwaka wa 2025 izaba yamaze kugeza ikoranabuhanga rya E-UBUZIMA mu mavuriro yose mu gihugu.

Iri koranabuhanga rizafasha mu kubika no guhanahana amakuru y’abarwayi mu buryo bwihuse kandi bugezweho, bikagabanya imvune ku barwayi ndetse bigafasha abaganga gutanga serivisi zinoze.

Abaganga ndetse n’abaturage bamaze kugerwaho n’iri koranabuhanga bavuga ko ribafasha kubona serivisi vuba, gukurikirana ubuzima bwabo bitagoranye no kugabanya amakarita y’impapuro yajyaga abura cyangwa agasaza.

U Rwanda rumaze imyaka mike rushyira imbaraga mu gukoresha ikoranabuhanga mu buzima, harimo uburyo bwo guhamagara muganga ku ikoranabuhanga, kwishyura serivisi ukoresheje ikoranabuhanga rya Irembo, ndetse n’uburyo bwo gukoresha drones mu kugeza amaraso n’imiti ku bigo nderabuzima.

Abaturage bashima ko iri terambere rizafasha mu kwihutisha serivisi z’ubuvuzi no kurushaho kugira ubuzima bwiza. Minisiteri y’Ubuzima yo ivuga ko intego ari uko buri wese mu Rwanda azajya ahabwa serivisi z’ubuzima zinoze kandi ku gihe, ahereye ku koroherezwa n’ikoranabuhanga.