Umutoza wa Manchester United yatangaje ko azongerera amasezerano Harry Maguire.

Umutoza wa Manchester United, Rúben Amorim, yemeje ko mu bakinnyi agomba kugumana bazagira icyo bamufasha harimo na myugariro wayo Harry Maguire.

Ibi ni bimwe mu byo yatangaje mu kiganiro yagiranye n’itangazamakuru, kuri uyu wa Gatanu, tariki ya 3 Mutarama 2025, agaragaza aho imyiteguro igeze y’umukino uzayihuza na Liverpool ku wa Gatandatu.

Maguire ni umwe mu bakinnyi bakunze kutavugwaho rumwe n’abakunzi ba Manchester United, ariko abatoza bose bageze muri iyi kipe ntibahwema kwerekana ko ari ingenzi cyane.

Yageze muri iyi kipe avuye muri Leicester City mu 2019 asinya amasezerano azamugeza mu 2026. Ayigeramo yari we myugariro wa mbere uhenze mu mateka y’Isi kuko yatanzweho agera kuri miliyoni 80 z’amapawundi.

Manchester United kugeza ubu iri ku mwanya wa 14 n’amanota 22 ku rutonde rw’agateganyo rwa Shampiyona y’u Bwongereza.